Aizawl August 7, 2023 : ZPM chhung inkhawma mithar lawmluttu Working President K Sapdanga chuan, “ZPM chuan a thlawna sum sem kan do tlat a, Mizoramah politics khelh dan thianghlim lantir kan tum,” a ti. ZPM Dan bu-a awm an Kalphung thar hlawm lian pali an neih te a sawi.

K. Sapdanga Working President chuan, “Kalphung thar kan zawrh mek hi eng nge a nih sawi nawn leh ka duh a, kan khingpui party-te chuan, "Kalphung Thar pawh an hrilhfiah thiam lo," tiin min puh a, Party mipuite leh min duhsaktu ten an lo chhianchhiahsak tur ZPM party Danpuiah Kalphung Thar chi li an dah te a sawi.

1. Kut hna thawktute tan Kalphung Thar :  ZPM sawrkar a din chuan, budget session hmasa berah, kut hnathawktute khai chhuahna turin, thlai thar leina tur sum budget-ah dah a ni ang. Hei hi kum 50 kalta chhunga sawrkar ding tawhah khan a la awm ngai lo a, Mizoram sawrkar tan leh mipuite tan thil thar, Kalphung Thar a ni.

2. Thalaite banah an kai ang :  Thalaite, lehkha an thiam emaw, thiam lo emaw, mahni kea dinga nupui fanau chawmna tur thawhchhuah nei tura ruahmanpui hi sawrkar hna hmasa turah ZPM chuan a ngai. 

3. Kut themthiamte tan paradise siam an tum : Mizopa kutchhuak furniture tlo bikzia leh mawizia te, hman a nawm danglamziate inhrilh kan ngai lo. Chuti chung chuan sawrkar office tam berah state pawn lam siam, tlo lo zawk, thawleng zawk, hman hrehawm zawk, nasa taka manto zawka lei kher thin a tulna an hre lo. 

4. Contract hna chu contractor kutah : Contractor dik takin hna an thawk ang, contract hna chu contractor kutah a kir leh ang a, sawrkar engineer ten an endik leh ang a, hlemhletna awm lo turin thuneituten fir takin an veng ang. Kawng tlo, building tlo neih leh tawh he ram hian a mamawh a, contractor-te lo inring turin a ti.

Sapdanga chuan an party mi ni thin, hun rei tak an lo hahpui tawh ZPM kalsan duh hial khawpa rilruna an nei chu vanduaithlak a tih thu a sawi a, ngaihdam an tulna apiangah ngaidam a, kir leh turin  sawm bawk.