Aizawl December 21, 2023: December ni 20, 2023 zan khan UD&PA Minister K. Sapdanga chuan Aizawl Smart City Project hnuaia hnathawh, Entrepreneurship Development Centre, Incubation Centre and Start Up Hub leh Aizawl Lungdawh te a hawng a, UD&PA Minister hmasa Tawnluia thawhrimna leh inpekna chhuanawm a tih thu a sawi.

UD&PA Minister K.Sapdanga chuan thu sawiin, "Sawrkar hmasate remhriatna leh thawhrimna zar kan zo tlang a, UD&PA Minister hmasa Pu Tawnluia thawhrimna leh inpekna bakah offcial-te inpekna pawh a chhuanawm hle a ni. Aizawl khawpuiah motor park-na a harsatzia kan hre tlang a, parking changkang tak Mechanical Parking kan nei thei ta te hi a lawmawm hle a, nakin lawkah Zodin-ah Car parking lian zawk hawn a la ni mai tur te hi a lawmawm hle a ni," a ti a.

Sapdanga chuan, "He lai Aizawl Lungdawh hi leimin avanga chhiatna nasa tak thlenna hmun kha a ni a, vawiinah mipui vantlang hawi thawvenna hmun atana cheibawl a ni ta hi a hlu hle a ni. He hmun hmangtu zawng zawng ten thiam tak leh dimdawi takin hmang ila, a neitu tak tak kan ni tih hre chungin hman tangkai kan tum zel dawn nia," a ti bawk.