Aizawl December 19, 2023 : Vawiin khan Hrangturzo biala atanga thlan tlin Lalmuanpuia Punte, Adviser to CM (Political) chuan a Office tur Old Secretariat Building, Treasury Square, 2nd Floor-ah luahin Pathian hnena hlanna hun an hmang.

Lalmuanpuia Punte chuan, "Engmah nei loin, Pathian rinchhanin ka kal tawp zel a. Ka mamawh tawk hi Pathianin min pe thin. Chumi rinchhan chuan ka ding ve tawp mai zel a. Tunah a hlawhtlinna min hmuhtir a, Pathian hnenah lawmthu ka sawi a ni," a ti a, hetianga Office hran luah ngai hiala a awm avangin lawmthu a sawi a, Pathian leh Chief Minister Lalduhoma chungah lawmthu a sawi bawk. 

Hunserh hi Major R. Lalrinngheta (Commanding Officer) in a hmang a. Thu tawi sawiin, ram roreltu atana Kohhran ṭawngṭaina hi ZPM party hmanga chhan a nih thu a sawi a. "Pathianin a hun tak zelah kan tana tha turin ro min relsak a. Roreltu kan dil a, ZPM min pe a ni tih hi kan pawm phawt a ngai a ni," a ti. Lalmuanpuia Punte pawh ro a relna kawnga Pathian dah hmasa ber turin a chah nghal bawk.

He Office hawnna hunserhah hian ZPM party hruaitute, ZORO hruaitute, MZP hruaitute leh henrual thaten hun an hmanpui a ni.