Aizawl: Mizo Students’ Union (MSU) General Headquarters, Aizawl chuan nimin atang khan Kamlova Chhangte tih hming-pu-a tribal certificate nei, Kamrul Laskar zawn hna an thawk tan a. A Tribal Certificate-a a chenna hmun tar lan, Thuampui vengah zawn hna hi an tan a; mahse, an hmu zo rih lo.

Hnatlangte hi Thuampui Branch YMA-ten an lo dawngsawng a, MSU hruaitute hi a chenna in nia hriatah an hruai a. Mahse, Kamrul Laskar hi a lo awm lo va, an thenawmte sawi danin kum hnih vel zet an hmuh tawh lo a ni.

Hnatlang kaihruaitu, Samuel Zoramthanpuia, General Secretary chuan Mizo hnam himna atana kan inhung bikna zah lo taka thiattu, Kamrul Laskar chu Mizoram pumah zawn chhunzawm zel a nih tur thu a sawi a, hmuh a nih hma zawng Mizo dan angin ni sarih (7) chhung MSU kaihhruainain zawn a ni ang, a ti. 

Mizoram hmun hrang hrangah MSU kaihhruainain Kamrul Laskar (Kamlova Chhangte) hi zawn mek a ni a, Zoram mipuite Kamrul Laskar awmna chin hria chuan MSU hruaitute hnenah hriattir turin an ngen a ni.