Aizawl January 10, 2023: Mizo Hnam Runah chhung inkhawm leh hawnna vawiin khan neih a ni a, thusawitu MNF Vice President Vanlalzawma chuan an sawrkar leh sawrkar loh chu an zavaia mawhphurhna a nih thu a sawi a, Adviser Lalruatkima pawhin Zohnahthlak Mizorama rawn raltlante tan theihtawp an chhuah zel tur thu leh manganga an awm an phal loh thu a sawi bawk.

Vanlalzawma chuan, "Nimin January ni 9-a Party hrang hrangin CYMA hmalakna thlawpa  mahni party Pisa hawn tur pawh khar hiala hma kan la thei kha Mizote kan lungrual zia lanna a ni. Kan unaute tan tha thlah lovin kan pen zel dawn a ni," a ti. Zawma chuan, Hnam martar te kha an huaisen vang leh an chák vanga martar an ni lova, ram an hmangaih vanga nun hlan an ni, a ti.

MNF mi leh sa te lungrual taka awm a tul thu sawiin, Zawma chuan, "Hqrs. ang pawhin hma kan la zel ang a, campaign pawh uar zawk leh ngawrh zawk a neih tum a ni a, kan vai hian kan sawrkar leh sawrkar lohah mawh kan phur a, kan ti thei vek a ni. Kum 2008-ah MLA 3 chiah kan nei a, kum 2013-ah MLA 5, kan han tang vak a kum 2018-ah chuan Pathian zarah sawrkarna kan chang ta a, lungrual tak leh pheikhai rual takin i kal zel ang u," a ti.

MNF Adviser leh minister ni bawk Lalruatkima pawhin thu sawiin, hmun hrang hrang Zofate harsatna tawh dan leh Mizoram sawrkar hmalakna te a tarlang. Minister chuan Bangladesh atanga rawn raltlan (refugee) te buaipui chu thil buaithlak tak, Politics khelhna atana hman chi pawh a nih chiah loh thu a sawi. "United Nation High Commissioner for Refugees Convention 1951 leh hemi behchhana Protocol 1967-a siamah India hi a signatory ram zingah a tel ve loh avangin hmalak a har zual a ni. Kan Mizopuite tawrhna leh manganna hi sawrkar ang pawhin kan hriatpui, hrehawm pawh kan ti. Mizoram Sawrkar chuan theih tawp kan chhuah a, kan chhuah zel dawn bawk a ni," tiin, Duh ang leh ruahman anga thil a kal chak thei rih lo chu pawi a tih thu a sawi.

Lalruatkima chuan, "Kan chipuite mangang a awm hi kan phal lo, a tul a nih chuan Central sawrkar pawh kan nawr zel dawn a ni. Buaina tawk te hi kan Hnam pui an nih miau vangin, Mizo tlawmngaihna leh thian chhhan thih ngam rilru kha kan Sawrkar Pu Zoramthanga kaihhruai hi chuan a kalpui zel dawn a ni. A tul a, a rem a nih chuan Bangladesh sawrkar te pawh kan la dawr ang," a ti.