Kum 2013 tawpah inthlanpui kan nei a Sorkar thar alo pianga. Rahbi thar min rahpui tumin beiseina nen Kum thar 2014 kan han chuangkai a rei vak lovah MP kan han thlang leh a, Sorkar laipui ah Sorkar thar a lo piang ve leh a. Rahbi thar tukin kan kal danphung min thlak thleng an tum ve tho bawk a. Rahbi thar rap tur hian thil inthlakthleng hrim hrim hian amah mai chuan awmzia anei lova, thil inthlakthleng (change) kan sawi lar viau hian hmasawnna a ken tel loh chuan buaina zakhua mai a ni. Hmasawn tur erawh chuan sukna ngai suk reng a theih lova thil thlakthleng leh kalphung hlui huai taka kan tihdanglam ngam tel erawh angai thung. A awmzia ber chu Rahbi thar kan rah hian Change leh Development a keng tel tur tihna ani ber awm e. Mizoram history-a mellung pawimawh tak phunin a awm mek a ni kan ti thei ang. Kum 1997 February atanga kum 17 zet kan lo hman tawh MLTP Act, 1995 chu Mizoram Excise Bill 2014-in thlak a lo ni ta a, MLTP ACT aiah MLPC rahbiah kan han chuangkai ta chu a ni a. He thilah erawh hi chuan zirchianna leh mipui mimirah pawh khapburna dan thlakthleng a hun tawh zia hi khapburna dan hman a nih hma atang hman a nih chhung zawng thangkhat lian teh meuh hi Kohhranah emaw, Khawtlangah emaw, sorkarah emaw vawiduai lo sawiho a lo ni tawh thin a. Tunah thenkhatin la duhlo in han sawisel viau thin mah se thla hnih thum awrh chuah kalpui a la nih avang hian he thil thlakthleng hian hmasawnna emaw a tha zawnga khawtlang nunah danglamna a la lantir teh chiam lo a nih pawhin a la reilo lulai em a, dawhthei taka nghah hi a la finthlak hmel. Tunlaia ni tin chanchinbuin Zu zawrh an bihchianna zulah duhthusam leh rawtna tlem i’n zep teh ang. 1. Millenium Centre ah Zu dawr pathum vel leh Bazar pui ah pakhat hi tih tak deuh a Zu dawr hawnna a la ni rih mai a, Chu chu Aizawl Dawrpui veng huam chhung ve ve a ni a. A dawr tute kan puinawi deuh anih pawhin a la hriatthiam awm viau. Aizawl chauh pawh ni lovin Zoram a Zu in miten kan intawm ala ni miau a. Excise Dept. lam in Zu leina card district hrang hrangah an pekchhuah ve reng laiin a zawrhna erawh District headquarter dangah a la awm ve si lova thenkhat sawi dan in Khawpui danga Zu leina card nei te pawh hi intiam rualin motor hmangin Aizawl ah zu leiin an rawn bazar thin an tih chu! 2. Sorkar hian mi mal thenkhatah hian zawrh phalna hi pe ta mai se, mi mal sumdawng tur chuan a hmunhmate pawh hi an hmu chak deuh a beiseiawm. Chutiang a nih loh pawhin sorkar hmun lo ram, sipai hmun emaw, sorkar pisa hmunpui ram awl ah te zuar ta se. Khawpui lunlai lo deuh pawh nise khapbur anih lai atang tawhin a in mite hi chuan a hla emaw a hnai emaw ZU hmun chu phunnawi lovin an pan anih kha maw. 3. Mizo te kan pawnlawina a lo lang leh thin a, a ruk a in duh card nei te, mahni nihna nen a inrem lova hriat avanga Zu lei zak si in duh bawk si an tam hle a ni awm e. Chung mite chuan an hnuaia thawk te tirh an ching a, a bikin sorkar hnathawkah. A thawk lem lohah pawh hun tam tak senga zu lei tura intlar mualpho ai chuan hlawh nei a mi tir ta mai an tam hle, zu no hnih khat lek lek hlawh tura tirh theih te chu veng tinah an kat nuk a, chutiang fuankhawm chu felfai pawh a har viau mai thei. Intlar buai lo leh felfai taka mahni duh zawng zu bur an khai ruk tet tet theih hun han nghak deuh ila, felfai taka zu lei leh in kan thiam chho ve zel a rinawm. 2015 kan chuankai chuan rahbi thar dang rap leh turin sorkarin chhung tin nghawng ruahmanna an siam leh a. Sikul kan kai hma ta suau suau mai a nih hi. Sorkar pawh hian kalphung ngaitih danglam har a ti a, Rahbi thar chu a rap ngam mai bik thin lo. Sikul kai hma kawnga thil thlakthleng hi ka thlawp zawng a ni a, chutih rual erawh chuan hmasawnna thlen nghal tur chuan beisei lo ila, hun te pawh a la duh deuh ang. Amaherawhchu, chhung tin nghawng thei thilah chuan sorkar pawh a hma fe atanga lo inpuahchah a, lo inhmakhawsuih awm tak hi duh ai chuan a vuaicha deuh. Thil tha duhna avangin he thil chungchanga duhkhawp lohna emaw rawtna emawte ka hmuh phak ve chin, Aizawl bik chungchangah i’n tarlang teh ang. 1. Thawhhona tha co-ordination a pawimawh hle, sikul kai hma hian inpuahchahna tha a awm lo emaw ni aw a tih theih. Sikul kai hun thuawih taka Aizawl khawpuiin a zawm tirh khan a zual zawpui vaihlenhlo tih ang maiin Traffic a jam nasa khawp mai, mi tam takin ngaimawhin thuneitute an hrilh a. Sikul tamna lai leh kawngpui pawimawh pengthuamah te tunhma zawng aiin Traffic Police duty-tir hma a ngai. He rawtna hi chu an tihlawhtling nghal vat a Traffic police lam pawh an thawhrimnaah fak an phu. 2. Khawpui kawng a zim avangin motor lian pakhat kawngsir a lo ding pawh hi sikul kai tur thlah runpui lai chuan a ti-jamtu a ni zel mai. Veng tamtakah dar 7 emaw 7:30 velah bawlhlawh paih motor lian 407 kawngpui sirah a ding fur a, a hnawk khawp mai. Local Council tin hian bawlhlawh paih hun hi sawn hma ta se a ziaawm hle ang. A nih loh pawhin ina kan awm deuh fur lai, zan dar 6 atang 7 inkarte hi hmang tangkai ta ila, zingah phak taka bawlhlawh paih tura thawh ai chuan thimhlim hi hmang tangkai thei ila. Commercial area deuh, Dawr hmun deuh ah chuan a buaithlak deuh mai thei, chutih rual erawh chuan Sikul tamna veng emaw kawngpui pawimawh tantlang veng te hi chuan kan bawlhlawh paih hunbi ennawn thei ila a lawmawm viau ang. 3. Private sikulah kan fate kan dah nasa a, a neitute pawhin sumdawnna tih an pha lo. Sum hmuhna naupangte leh an chhungte zangkhaina leh nawmna emaw awlsamna, a tawi zawngin an convenience erawh an ngaithah hle. Sikul hmun rem lo takah an siam a. Nursery naupang bang nghak tur mai mai awmna pawh nei zo lote an ni. Chutiang khawpa hmunhma rem lote chu sikul naupang ngah ngah an ni lawi a. Zing sikul inthlahah pawh naupang chhuk chhung pawh motor tlem azawng emaw, two wheeler tak ngial pawh khawmuanna tur hmunhma an nei lo va, kawngpuia motor tlan pangngai an tikhaihlak nasa hle. Hetianga sikul naupang leh a thlahtute tan pawha harsatna emaw, buaina awm thei hmuna sikul neite hi sorkar hian a rang lam in endik thei se. 4. khawpuiah hian sikul hi hla tak takah kan lo inkaltir nasa khawp mai. Chu chu mi mal inzuamna a nih rualin, tan tlai lai kha chuan chutianga mahni in atanga hla taka sikul kaite pawh khan public transport-te kha an hmang nasa, an tlai chuang lo. Tunah tan hma a nih avang hian chutiang ti hman lo chuan kan nei emaw, nei lo emaw, Bike leh scooter bakah Taxi thlengin kan inthlah lawp lawp a, lirthei veivak zingah tunhma aia tam thutna bul a ni awm e. Han hmang rei deuh ila, hla tak taka sikul kai lem lova mahni vengah leh hnaivaiah sikul kan kai chuan a ziaawm sawt ang. 5. Kar hmasa lawkah khan khawpui chhunga motor lian tlan luh theih hun kha zing lamah chuan sawn hma tur tih kha ka lo hmu a. Hetiang hi chu sikul kai hma a nih hma daiha lo ruahman tawh awm a ni a. Tun thleng hian an la ti tak tak lo nge motor lian pui pui, sumdawng bungraw unload zo ni awm tak tak, tlanpelh hleitheih si loh, sikul naupang hruai lirthei veivak tam laia lo intlazep ve thin, traffic ti-jam-tu ni bawk an la awm nual. Hmalak harsa lo tak tur a ni a, bengkhawn ran chi a ni. Hmasawnna beisei avang ruahmana thar leh rahbi thar rah hian mipuite thleng phak danglamna tak tak thlen hram se, chuti a nih lo chuan kan budget te hi a nei zawk leh sorkar rawihte hlawha a kal ral tam fo chuan retheite au rawl hi a ring duh. Mipui pawhin dawhthei takin thlir ila. Roreltute hian hmasawnna tak tak hi an duhin an pawchhuak zo dawn em? Heng thil hian khawtlangah leh ramah hmasawnna a ken tel si loh chuan roreltute chalah hian phung a tawp ang a, a mawhphurtute hi mipuiin an ring leh mai mai tawh lo vang. Chutih rual erawh chuan kawng dik min zawhpuituah kan ngai a nih chuan a hmingthatnate pawh tel se mipui hian kan thik awm lo ve.