Kangthelhtuten tlang kang zual insasengsan

Admin - Sep 26, 2021

Chenna in 350 chuang a chhe tawh

Spanish Island, La Palma-a kangthelhtute chuan tlangkang inphuh chhuak a nasat zual zel avangin him dawn lova inhriain an insasengsan leh rih.

Cumbre Vieja tlangkang hi Pathianni atanga inphuh chhuak tan kha niin mi sang tam takin hmun him an pan phah tawh a, chenna in 350 chuang a chhe tawh.

Zirtawpni khan thuneitute chuan khaw pathuma chengte chu hmun hima insawn rih turin an hriattir thar leh tawh bawk.

Meikhu dum chhah tak inphuh chhuahna chin chuan km li chuang a awh belh leh tawh a, tumhmun atanga thlawhna chhuak tur leh lut tur chu tihtawp rih a ni.

Tlangkang avanga thi erawh an awm hriat a la ni lo.

Spanish chanchinbute chuan Zirtawpni khan tlangkang hi a inphuh chhuak nasa zual niin an sawi a. A inphuh chhuahna kua pawh a insiam belh niin an tar lang bawk.

La Palma fire service-in social media-a an tar lanah chuan kangthelhtute chu an awmna lai hmun atan a hlauhawm lutuk avangin an kal sawn leh rih.

Kangthelhtute hi Todoque velah tlangkang inphuh chhuak laka mi an him theih nana thawk an ni.

Zirtawpni khan Tajuya, Tacande de Abajo leh Tacande de Arriba-a cheng mi 1,000 vel chu an dinhmun a him loh theih avangin insawn chhuak tura hrilh an ni.

Binter chuan La Palma pan tur thlawhna zawng zawng chu tlangkang avang hian a tiding rih vek a. Spanish airline Iberia pawhin an thlawhna an tir chhuak duh rih lo bawk.

Share now