October 18, 2022; YMA Sub headquarters, Lunglei huaihawtin tukin dar 6 atang khan tlai dar 5 thleng awh turin, Aizawl - Thenzawl - Lunglei (ATL) World Bank kawngpui chhia siamthat a nih theih nana sawrkar nawr nan, Lunglei district chhungah 'No Vehicles Day' hman a ni.

YMA Sub. Hqrs. Lunglei hruaitute hnen atanga ZALEN thudawn danin, 'No Vehicles Day' hi tukin dar 6 atang khan kalpui niin, lirthei neituten tha takin an zawm a, No Vehicles Day in a huam loh te tih loh chu lirthei veivak a awm lo a, mipui pawhin he an hmalakna hi tha takin an thlawp a ni.

No Vehicles Day hman a nih chhungin Lunglei khawpui bakah, district dang atanga Lunglei district luh theihna hmunah te duty an indah a, tul zual bik tak tak tih loh chu lirthei lut leh chhuak a awm lo.

YMA Sub-Hqrs. Lunglei hruaituten tun hnaia thuthar thehdarhtute an kawmna ah, ATL kawng a chhiat em avangin chhim lam mipui an buai hle tih an sawi a, "Kawng hi chhim mipuite tan kan nunna hnar, engkim kan chawk luhna a ni. Heti tak maia a chhia hi pawi kan ti takzet. Tun dinhmunah hian lirthei chetsualna thlengin mihring nunna hialin a tuar ang tih a hlauhawm takzet a ni," an ti.