Kenya khawthlang lam hmun lai laia a khalhtuin a thunun zawh loh truckin lirthei dang leh kea kalte a hnawlah mi 48 vel an thi.

“Tun thleng chuan mi 48 thi an awm tawh tih kan chiang a, truck hnuaiah mi pahnih khan an la awm erawh kan ring,” tiin tual chhung police commander Geoffrey Mayek chuan a sawi a. Chetsualna hi Zirtawpni zana Kericho leh Nakuru khaw inkar kawngpuia thleng niin a sawi.

“Mi 30 laiin hliam na tak an tuar bawk a, damdawi in hrang hrangah hmanhmawh taka kalpui an ni a. Hliam zat hi an pun pawh a rinawm a; mahse, tunah chuan 30 chu an ni rih,” a ti.

Regional police commander Tom Odera chuan thi hi mi 48 an ni tih a sawi.

Ruah tam tak a sur a, hei hian chhanchhuah leh chet lak zung zung a tiharsa deuh niin tual chhung chanchinbute chuan an tar lang.

“Truck hi Kericho pana tlan lai niin kan hria a, a khalhtu hian thunun zo lovin an dinna hmuna matatus (minibus) dingte a hnawl ta chiam a, bus-a lo chuang sate bakah a bul hnaia kea lo kal leh bus chang mekte a hnawl ta chiam a ni,” tiin Mayek chuan a sawi.

He thil thleng hmutu, lirthei khalh ve thin tho, Peter Otieno chuan, “Chak taka truck lian, a hnunga thil hnuk ang chi lo tlan ka hmu a. Rang taka pengin ka hma zawn taka min sut loh nan ka inher a. Ka hnunga lo kalte chuan kawng sira eng emaw lei tura kawiah min ngai a, min lehpel a, ani chu a rawn su zui ta a. A hnunga a hnuh chu a let zui a, lirthei dang lo awmte chu a hnawl ta chiam a ni,” a ti.

“Ka mit ngeiin ruang 20 chuang ka hmu a. Lirthei hnuaia ruang dang awm pawh ka hmu a ni,” tiin rapthlak a tih thu a sawi.

Kericho Governor Erick Mutai chuan a pawi a tih tak zet thu a sawi ve bawk.

Chhiatna thlen dan

Kenya Red Cross chuan truck hian lirthei paruk aia tam a hnawl a, mihring a su chiam bawk niin an sawi a. Tual chhung  television station-ten video leh thlalak an tihchhuahah pawh lirthei eng emaw zat insu khawm a lang.

Mi 48 zet an thih avang hian he chetsualna hi tun hnai kum eng emaw ti chhunga Kenya-a lirthei chetsualna rapthlak ber a tling a. Nikum khan an ram lailia leia tlan lai bus chesual, a hnuai luia tlaah mi 34 an lo thi tawh bawk.

Kenya-ah hian lirthei chesual avanga mihring thi hi tun hnaiah a pung zawngin a kal tih sorkarin a chhinchhiahnaah a lang a. Hengte hi an kawngpui that tawk loh vang bakah lirthei hlui tawh, thunun harsa tak tak a tam vang nia ngaih a ni.