India rama tun hnaia Covid-19 lengin a tihbuai nasat ber, Kerala-ah chuan hri leng thihpui an tipung thut a, hei hian ni khata ram puma thi zat chhinchhiah pawh a tipung nasa hle.

Chhim lam state-ah hian a hma lama Covid-19 kaihhnawiha lo thi tawh, chhan hrang hrang avanga a hlimchhawna hri leng vanga thi anga chhinchhiah lohte chu darkar 24 liam ta chhung khan belh an ni.

Darkar 24 liam ta chhunga thi ni kher lo, thi anga belh thar hi mi 292 an awm a, darkar 24 chhunga thihpui zat tak chu mi 271 an ni thung.

Kerala-a thi zat an pun thut avang hian India ram puma thihpui pawh ni khata mi 160 leh 200 inkar vel ni ngar ngar tawh chu mi 666 zet thi awm belh angin chhinchhiah a ni ta a ni.

India ramah hian Covid-19 vanga thi hi 4,53,708 an awm ta a ni.

Darkar 24 liam ta chhung khan India-ah hian Covid-19 kai mi 16,326 hmuh chhuah leh hman an ni a, mi 3,41,59,562 an tling ta.

Damlo enkawl mek erawh tlahniam zelin mi 1,73,728 chauh an awm tawh a, ni 233 hnua a tlem leh lai ber niin union health ministry chuan a tar lang.

Hri kai hmuh tawh zawng zawng atanga chhutin damlo enkawl mek hi 0.51% chauh an ni tawh a, March, 2020 hnu lama a hniam lai ber a ni a. Enkawl dam tawh 98.16% an awm thung.

Darkar 24 liam ta chhung pawh khan mi 17,677 chu dama chhuahtir leh hman an ni tih health ministry chuan a sawi.

Darkar 24 liam ta chhung khan invenna damdawi pawh dose nuai 68.48 pek leh hman a ni a. A chhinchhiahna, CoWIN atanga a lan dan chuan heng zinga dose 40 dawn chu a dose hnihna atana pek an ni a. Dose vaibelchhe 101.3 chuang pek a ni tawh.