India-a Kerala-a chengte chu Covid kai hmuh chhuah thar a tam leh avangin fimkhur tura tih an ni a, chiai erawh a tul lo an ti.

Chhim lam state-ah hian Covid-19 chi darh thar mek, JN.1 an tih kai hmuh an awm nual a ni.

He hri bik kai hi ram dang, US leh China-ah te pawh hmuh an lo awm nual tawh.

World Health Organization (WHO) chuan Covid-19 vaccine hrang hrangten JN.1 lakah hian mi a venghim thei tih an sawi.

Indian chhin lam state-ah hian Covid-19 kai enkawl lai mi 1,324 an awm mek a, Inrinni khan mi paliin an thihpui bawk a. Thuneitute chuan kai an tam leh chhan hi endik tihpun a nih leh vang niin an sawi.

Tuna hri kai hmuh leh nual an ni hi JN.1 vang a ni em tih erawh chian a la ni lo va. Sample tlem tete chauh zelin, tih dan thin pangngaiin eng ang chi ber nge an kai tih endik thin chauh an ni.

State Health Minister Veena George chuan lungngaihna tur a awm loh thu leh an inralrin thu a sawi.

JN.1 hi thla tirah khan Kerala-ah hian RT-PCR test sample pakhat atanga hmuh a ni tih thuneituten an sawi.

India rama Covid-19 viltu laboratory inzawm, INSACOG-in an tih dan thin pangngaia eng ang chi ber nge miin an kai tih hriat nana sample an endikna atanga hmuh chhuah a ni.

A kai an hmuh hmasak ber hi pitar kum 79 mi niin khawsik ser serin a tuam a, a bak natna na vak a nei lo va, tunah chuan a dam leh vek tawh nghe nghe.

George-i chuan Pathianni khan he chi bik hi ram chhung hmun dangah pawh a darh tawh niin a sawi.

“Thla eng emaw ti liam taah khan he chi hi Indian tlem azawng, Singapore tumhmuna endik zingah hmuh a ni,” tiin thuthar lakhawmtute hnenah a sawi.

Karnataka leh Tamil Nadu state-te pawh an thenawm, Kerala-a hri kai an pun leh deuh avangin an inralring tan bawk.

Hetih lai hian union health ministry chuan state eng emaw zata damdawi inah Covid kai an tam leh thuta inpeih a nih theih nan mock drill a nei a. He drill hi JN.1 kai hmuh thar an tam deuh avanga neih erawh a ni lo tih thuneitute chuan an sawi.

Indian Council of Medical Research (ICMR) chuan Kerala-a Covid kai an pung leh hi an ngaihven reng tih an sawi.

“Kerala-ah hian chawlhkar tam vak lo liam ta atang khan COVID-19 kai an pung leh tlat a. Hei hi tlang hri leng kaite sample endik a tam vang a ni pakhat,” tiin ICMR Director General Rajiv Bahl chuan a sawi.