Kochi, Kerala-a university-a innek buaina chhuakah zirlai pali an thi a, mi dang 64 velin hliam an tuar bawk.

Chhiatna hi Cochin University of Science and Technology (CUSAT)-a Inrinnia thleng kha niin hliam tuar zinga zirlai pali chu an dinhmun a tha lo hle niin Kerala Health Minister Veena George chuan a sawi.

Campus chhungah hian tech fest neih niin chung nei lo auditorium-a zai thiam, Nikhita Gandhi a zai laiin zirlai pungkhawmte hi an innek buai ta a ni.

A hmun hi phalna (pass) nei chauh luh theih a ni a; mahse, ruah a sur a, hei hian thil a tibuai zo ta nia sawi a ni a. Pawna luh hun nghaka ding khawmte chuan hmanhmawh takin auditorium an pan khawm a, an innek ta chiam a, thenkhat tluin an inchil zui ta a ni.

Chief Minister Pinarayi Vijayan-a kaihhruaiin Inrinni zan khan Kozhikode-ah minister-te chu sorkar guest house-ah an thukhawm nghal a. Minister-te hian chhiatna a thleng hi pawi an tiin thi chhungte an tawrhpui tak zet tih an sawi hlawm a, Pathiannia CPM-in hun an hman tur, Nava Kerala Sadas-a hlimhlawp thil leh zai leh lâm lam ang chi zawng zawng tih loh ni se an ti nghal.

Zirlai hliam tuar 64 vel damdawi in hrang hrangah enkawl mek an ni a. George-i chuan Kochi-a Kalamassery Medical College-ah hmeichhia leh mipa pahnih ve ve ruang lak tawh a ni tih a sawi.

“He thil thleng hi a vanduaithlak tak zet a. Kalamassery Medical College-ah hliam tuar mi 46 lak an ni a, ruang pali lak a ni bawk a. Mi dang pali dinhmun a tha lo hle a, pahnih chu mi mal damdawi inah enkawl niin pahnih erawh sorkar damdawi inah dah an ni,” tiin a sawi.

Health minister chuan, “Hliam tuar zinga 18 chu mi mal damdawi inah dah an ni a. Kan hriat veleh damdawi inte chu inring turin kan ti nghal a, damdawi ina doctor-te hnen atangin an dinhmun kan ngaichang zel a ni,” a ti.

Minister-te thukhawm hian Industry Minister P Rajeev leh Higher Education Minister Dr R Bindhu te chu university awmna, Kalamassery-a kal nghal tura tih niin George-i chu hliam tuarte dinhmun ngaichang reng tura tih a ni bawk a. Chief minister pawhin hliam tuarte hi a tha thei ang bera enkawl turin a ti bawk.

Municipal Councillor Pramod chuan luh leh chhuah nana gate pakhat hman tawm chu innek buaina thlen chhan pakhat a nih thu a sawi.

“Zirlaiten luh leh chhuah nan gate pakhat an hmang a. A lut lam hi an tlu hmasa a, gate pantu tam takin an chil zui ta a, an rap ta hrep a ni,” tiin a sawi niin news agency ANI chuan a tar lang.