Ministry of external affairs (MEA) chuan Russia-in Ukraine a rûn mekah a kah nasat tak, Kharkiv-a Indian awm zawng zawng an lak chhuah kim tawh thu a sawi.

Ukraine khawpui lian ber pahnihna hi Inrinni pawh khan Russia chuan a chhu zui nasa hle.

MEA thupuangtu, Arindam Bagchi chuan Ukraine atanga Indian hruai haw hna thawh kalpui meka an hmabak lian leh hmasa chu Sumy khawpuia awmte a nih thu leh inkahna a nasat avangin vei vel a khirh hle niin a sawi.

“Pisochyn leh Kharkiv-a mite chu kan la chhuak kim hnai a, Kharkhiv-ah phei chuan tumah kan mi awm an awm tawh lo. Sumy lamah kan insawrbing leh dawn a, inbeihna a nasat avangin inlak chhuahna a tha lo hle a, inkahhai chu duhthlan ber a ni,” tiin a sawi niin news agency ANI chuan a tar lang.

Thuthar lakhawmtute a kawmnaah Bagchi chuan darkar 24 liam ta chhungin thlawhna 15 hmangin Indian phurh haw niin mi 2,900 vel an chuang a. “Indian 13,300 vel hruai haw an ni tawh a, darkar 24 lo awm leh turah hia thlawhna 13 a lo thleng leh ang,” a ti. 

“Ukraine-ah engzat nge la awm hriat kan tum a, embassy chuan a bepawp hlawm a, an zat erawh hriat mai theih a ni lo. Kharkiv bula  Pisochyn atangin zirlai 298 lak chhuah chu vawiinah zawh a ni ang,” a ti.

“Sumy hi a buaithlak hle a. Lehlam lehlam hi silai hmetpuak tawh lo turin na takin kan ngen a, nunna tan a hlauhawm rih hle a. Indian zirlaite hi an campus-ah an la awm hlawm a, kan team-te hian khawchhak lam an hawi tan a, a buaithlak ber chu inkahna hi a ni,” a ti.