Aizawl June 18, 2023: Dengue natna tibo tura khawtlangten a tir atanga mahni huam chhung thenfai kawnga hma an lak (source reduction) ve loh chuan health department chuan damdawi kah (fogging) tih an tum tawh lo.

Khawsik natna chi khat, malaria leh dengue chungchang zirhona chu health department huaihawtin Aizawl Press Club-ah neih a ni a. He huna zirtirna petu National Health Mission (NHM) hnuaia State Vector Borne Disease Control Programme (SVBDCP) mi thiamte chuan chhum ang maia an kah khuk thin, fogging chu khawtlang mipuiten hma an lak ve phawt loh chuan tih an tum tawh lo tih an sawi.

“Fogging hian dengue natna thlentu thosi puitling chauh a tihlum thei a. Thosi note pianna tihbo a nih phawt loh chuan awmzia a nei lo a. Chuvangin, fogging tih nan hian a tlak em tih kan enfiah hnuah chauh kah kan tum tawh,” an ti a. Tunlai hian hemi kawnga veng hrang hrangte hmalak dan an enfiah mek niin an sawi bawk.

Health department thawkte chuan nikuma Aizawl-ah dengue a hluar chhan chu thosi pian theihna a tam vang nia sawiin, “In sak a tam a, thosi pian theihna tur tui tling a tam avangin thosi an inthlahpung nasa a, hei vang hian a hluar niin kan hria,” an ti a. In saknaa tui tlingte chu kar khat danah a thar a thlak turin an ngen tih sawiin hei hi an ti thei lo a nih pawhin khawnvartui emaw, sahbon tui emaw lei thin turin mipuite an ngen tih an sawi.

Nikum chhung khan Mizoramah dengue natna inringhlel mi 5,252-te thisen test-ah hri vei 1,868 hmuhchhuah a ni a, dengue vanga thi mi panga an awm bawk.