July a lum em em thla

Asia khawmualpuiah July thla lum ber tum a ni.

Europe khawmualpuiah pawh July thla a lum ber dawttu a ni a. Europe chhim lam hmun tam takah chuan 40°C chung lam a ni a. Italy chuan Europe khawmualpuia a lum ber tum tawng tharin Sicily-ah 48.8°C zet a ni.

North America khawmualpuiah pawh July thla a lum ber parukna a ni phak a. June thla tawp lamah khan Canada chuan a lum ber tum tawng bawkin British Columbia-a Lytton-ah chuan 46.6°C a tling phak.

July thla kha Australia-a a lum ber thla palina niin New Zealand-ah parukna a ni bawk.

Africa khawmualpuiah pasarihna a ni a. South America-ah 10-na a ni thung.

July thla chu khawvel puma a lum ber thla a nih thu United States-a federal scientific & regulatory agency chuan a sawi.

Khawmual leh tuipui lum dan chawhrual chu kum zabi 20-naa a lum dan 15.8°C aiin 0.93°C-in a lum zawk niin an tar lang.

Hei hi kum 142 zet kal ta atanga khawvel lum dan an lo chhinchhiah tawh chinah a lum ber tum a ni a. A hmaa a lum ber tum chu July, 2016 kha niin kum 2019 leh 2020 khan a nihrual bawk.

Mi thiamte chuan hei hi hun rei tak atang tawha sik leh sa inthlak nghawng a ni tih a sawi.

National Oceanic & Atmospheric Administration (NOAA)-in thuchhuah an siamah chuan July-a thil awm dan chu ngaihven ngai tak a nih thu an tar lang.

“Hetiang thilah hi chuan hmun tha lo tak a ni tih a lang,” tiin NOAA administrator Rick Spinrad chuan a sawi.

“Record thar hian khawvel pum hi sik leh sa inthlak nasa lutukin a tibuaiin a tichhe mek zel a ni tih a tihlan belh a ni,” a ti bawk.

Khawmual leh tuipui lum dan chawhrual hi kum 2016 aiin 0.01°C-in a sang zawk a ni.

Khawvel hmar lam, Northern Hemisphere-ah chuan khawmual lum dan hi beisei phak bak niin 1.54°C laiin a hmaa a lum ber chhinchhiah, kum 2012-a mi aiin a sang.

An chhinchhiahna atang chuan July thla kha Asia khawmualpuia a lum ber thla a ni a, Europe khawmualpuiah pawh July, 2018 tih lohva a lum ber thla a ni bawk.

NOAA-in thuchhuah an siamah chuan July thlaa sik leh sa awm dan mumal lo hrang hrang an tilang bawk a. Hetah hian July thla chhung khan khawvel pumah tropical cyclone che vel a tam hle a, a hming phuah tura ruahmanna awm sa aiin a tam daih zawk a ni.

Kar liam ta tir lamah khan United Nations chuan sik leh sa awm dan inthlak nasa lutuk chuan khawvelah nghawng lian tak, beisei aia nasa a nei tih a sawi a. Thil awm dan inthlak thenkhat phei chu kum 100 atanga 1,000 vela inthlak dan tur anga ngaih ang vela inthlak danglam chak a awm tih an sawi.

UN Secretary General António Guterres chuan khaw lum chak lutuk chu ‘mihringte tana inralrinna hnuhnung’ tiin a sawi hial.

“Kan tanrual chuan sik leh sa uchuak tak tak avanga chhiatna hi kan dang kir thei a. Mahse, tuna kan hriat hi chu tihkhawtlai theih pawh a ni tawh lo va, chhuanlam siam tur pawh a awm tawh lo,” a ti bawk.

Report siamtute chuan kum 1970 atang khan khawvel lum dan hi a sang zel tih an sawi a, kum 50 dan zela a lumna aia sangin kum 2,000 hnu lamah a lum tawh niin an sawi bawk.