Deloitte chuan thla khat liam ta khan kum 2022 Football club hausa thlanna Money League tichhuakin, football club te sum lakluh leh hausakna an teh chhuak a, top 20 club an thlanchhuah te chu European club vek an ni a, an average revenue chu €409 million niin 2019-20 aiin a thanna a sang zawk a ni.

Report-a a lan dan chuan, coronavirus hrileng avang khan club hrang hrang sum lakluh a tlahniam nasa hle a, club hrang hrang sum hloh hi €2 billion (£1.7bn/$2.2bn) vel bawr anga chhut a ni. Nikum 2021 khan Barcelona FC chu khawvel football club hausa berah Deloitte hian an thlang a, mahse thla tam a liam hmain Manchester City chuan rawn lehpelin an sum neih zawng zawng hi €644.9 million (£537m/$709m) a ni.

Covid-19 leh thil hrang hrang vangin khawvel sum pai dinhmun a inthlak danglam fo thin a, hausa te an hausa reng thei bik lo va, rethei pawh an rethei reng bik hek lo. Barcelona pawhin harsatna tawk chhovin a elpui ber pakhat Real Madrid hnuaiah awmin palina an ni phak hram a, Bundesliga champion Bayern Munich chu pathumna an ni thung.

He list-a top 20 zingah hian Premier League club 11 zet an awm a Paris Saint-Germain chu France atang lang awmchhun niin German leh Italian football atangin club pahnih ve ve an lang bawk. Heng list-a lang football club hausa 10 zinga club panga te hi Premier League team te an ni a, chung te chu City, Chelsea, Manchester United, Spurs leh Liverpool te an ni a, Arsenal chuan table-ah 11-na an luah thung. West Ham United, Wolves leh Everton te chungah Leicester City chu awmin 15-na dinhmun an hauh. Top 20 zinga club dangte Borussia Dortmund, Inter, Atletico Madrid leh Zenit te pawh hi club lian leh lar tak tak an ni. 

Deloitte 2022 Football Money League ranking: Khawvel football club hausa top 20 list chu:

Ranking    Team            Total revenue
1.    Manchester City        €644.9m
2.    Real Madrid        €640.7m
3.    Bayern Munich        €611.4m
4.    Barcelona        €582.1m
5.    Manchester United    €558.0m
6.    Paris Saint-Germain    €556.2m
7.    Liverpool        €550.4m
8.    Chelsea            €493.1m
9.    Juventus        €433.5m
10.    Tottenham        €406.2m
11.    Arsenal            €366.5m
12.    Borussia Dortmund    €337.6m
13.    Atletico Madrid        €332.8m
14.    Inter            €330.9m
15.    Leicester City        €255.5m
16.    West Ham United        €221.5m
17.    Wolverhampton Wanderers    €219.2m
18.    Everton            €218.1m
19.    Zenit            €212.0m
20.    Aston Villa        €207.3m

Manchester City than chhauh dan hi a mak zawk hial a, nikum lamah panga-na niin pakhatnaah an kai chho dawrh a, Barcelona erawhin ngai an awh phak lo hle thung. 2021 nipui lai khan hlawh tam tak an pek thin, tum 7 zet Ballon d'Or dawng tawh Lionel Messi an la kawl a, khatih hunlai khan Barca khan leiba €1.2 billion (£1.1b/$1.5b) zet an nei bawk, PSG lamah Argentine a kal hnu khan an ziaawm chho tan nia sawi a awm.  

Top 20 chung lam top 30-ah pawh hian Premier League lam club pathum Leeds United, Southampton leh Newcastle United te an la awm a, Roma, Atalanta, Napoli, Lazio leh AC Milan te chu Serie A lam atangin an lang ve thung.