Aizawl : Nimin khan India chuan tum khata hri danna lak runpui lian bera chhal, 'COVID-19 vaccination campaign' chu India ram state leh UT zawng zawngah a rualin a kalpui a, Mizorama Covid hri danna hun hmanna lian ber Civil Hospital, Aizawl-ah neih chu Health & Family Welfare minister Dr. R. Lalthangliana chuan a hmanpui a, he hunah hian he damdawi in-a 4th Grade hna thawk mek, Lalmuanpuii, kum 44 Nursery Veng chu Mizoram-a he vaccine la hmasaber ni turin hri danna hi pek a ni.

He hun hmanpuitu Dr. R. Lalthangliana chuan, "India ram chu sawi loh ka chhut dan chuan, khawvel huap ang pawhin titha ber kan ni hialin ka hria a, khawvela ram ropui leh changkang, health facilities nei tha tak tak ho pawh he natna lakah hian an tlawm a ni," a ti.

H&FW Minister chuan, "Kum 2020 January thla tawp lam atangin khawvelin he natna hi a hmelhriat tan a, Health ministry lamin a rang thei ang berin meeting ko rawh se, an tih angin keini pawhin hma kan la nghal a, he thu ka hriat ni hian ka programme zawng zawng cancel-in departmnent hrang hrang te nen meeting kan nei nghal a ni. He meeting kan neih atanga thla 11 leh a chanve na chiah ah Zirtawpni khan meeting kan nei a, Inkhawm phalsak kan rel a, limit awmin zirna in pawh hawn phalsak an ni. Kan economy khawih eizawnna hrang hrang tan pawh kawng kan hawng leh tan a, heng zawng zawng kan tih theihna chhan chu Pathian vang a ni," a ti.

"Vaccine a thlen avang hian kan him vek tihna a ni lo, vawiinah launching hun kan hmang thei a, thla 11 leh a chanve chiah chiahah niminah thutlukna lian tak kan siam thei hi a lawmawm a, a danglam em em a ni. Covid-19 aia Mizo fate min suihkhawm tu hi an awm ka la hre lo, Kohhran pawl zawng zawng, NGO zawng zawng te he natna hian min pawt khawm a, he natna avang hian political party zawng zawng lungrual tak maia kan han luangkhawm thei te hi a ropui a, Pathian pawhin he ram hi malsawm loh theih loh a ti ni hian ka hria a, kawng dangah pawh mal min sawm zel hi ka ring tlat a ni," a ti. Minister hian Inrinni thleng khan Cumulative case 4314 kan nei tawh tih sawiin, heng zinga 97.93% te chu an dam tawh a, Zirtawpni khan active case 96 neiin tukinah chuan active case 80 chiah active case hi kan nei tawh tiin, Ningani-a sang chuang test neih atanga positive pakhatmah kan nei lo kha Pathianin mak tak maiin min hruai nia a hriat thu a sawi.

State dang leh India ram chungchang a sawi naah Dr. Thangtea chuan, "India ramah mi nuai 105 chuang he hri hi an kai tawh thu leh mi 152094 in an thihpui tawh thu a sawi a, hetiang kara keini state te Pathianin min ven dan ha ropui danglam em em a ni," a ti. Hmarchhak state dang te ngaihtuaha Mizorama thi kan tlem chu thil lawmawm tak a ni tiin, thi kan neih te pawh natna benvawn nei sa, Covid hri hi vei lo mah se, an damchhuak ang em tih theih vek an ni, a ti.

Mizoram-in he hripui vei a neih chhoh dan sawiin, March -ah Europe atanga rawn haw in a vei tih hmuchhuah a ni a, April leh May-ah hmuh belh an awm loh thu leh mi tam takin kan khawl neih chu tha tawk lovah an ngai hial, tiin June-ah mi 159 in an vei tih hmuchhuah a ni a, September-ah phei chuan mi 1006-in an vei belh a. India Health Ministry chuan December thlaah chuan a tlem berah mi 5000 chuangin kan vei hman tur angin an chhut hial, thu a sawi. October-ah kai thar 740 an han awm chho leh tiin, November chu thla khata vei an tam ber tum a nih thu a sawi a, mi 1089 zet an tling a, amaherawhchu December-ah mi 369 chiah hmuchhuah niin, kan tlahniam ta dawrh tih a tarlang a, January 15 thleng khan 98 hmuchhuah leh a nih thu leh niminah kha chuan active case 80 chiah a awm thu sawiin, heng zinga mi 57 te chu Aizawl a mi an ni, tiin, Aizawl-ah hi chuan vaccine a lo thleng a nih pawhin tan lak a la ngaih thu leh inthlahdah theih a la nih loh thu a sawi bawk.

Dr. R. Lalthangliana chuan medical science lama mithiam a nih loh thu a sawi rualin, "He vaccine an siam hi pawm lo thei lo dinhmunah kan ding a, kan ram mipui te tana tha lo tur hi sawrkar laipui hian a ngaihtuah lovang tih hi ka ring a, India sawrkar hian mithiam rual, medical science lama mi bik a rawn dawn tih a chiang a, chuvangin he vaccine hi a tha tura ngai phawt ang. Rilru hah nan hmang lo ila, kan dawn dan tur ang hi a dik takin dawng ila tih hi ka ngaihdan a ni. India hi medical science lamah hian a hniam lo a ni tih hi ka hriat dan a ni," a ti.

Nimina India ram hmun hrang hranga hri lak runpui hi hmun 3,000 chuangah neih niin Mizoramah pawh Civil Hospital Aizawl, Zoram Medical College, Kulikawn Sub District Hospital, Urban PHC, ITI leh Civil Hospital Lunglei-ah te hri laka invenna hi pek an ni a, heng hmunah te hian mi 100 zel pek tum niin, naktuk Thawhtani atangin Mizoram chhung district zawng zawngah kalpui chhunzawm a ni ang a, a thawhkhatna a vaccine dawngtur healthcare workers mi 8000 chuang hi January thla chhunga pek kim vek tur a ni. India ram pumah hian ruahman anga thil a kal a nih chuan nimin ringawt khan mi 3,00,000 chuangin indanna hi la tur anga chhut a ni.