ZALEN, Apr. 20, 2025: Kristiante ni pawimawh, khen beha Isua a awm hnua a thawh lehna ni champha, Easter Sunday chu Pathianni khan Mizorama kohhran hrang hrangten urhsun takin an hmang.

Catholic Kohhran chuan sakhaw hunpuiah Judate ni chhiar dan an zawm avangin Inrinni tlai ni a tlak atang khan Easter pualin hun an hmang tan a. Easter Vigil hmanga bul tanin ‘Krista chu êng a ni’ tih lantir nan mei thar lain biak ina an luhpui hnuah thawhlehna an puang a. He inkhawm hi an inkhawm urhsun leh ropui ber niin inkhawm pawh an thahnem hle.

Pathianniah pawh mass an neih bakah kohhran tam ber chuan ruai an theh a, zan lamah sathau khawnvar chhiin Isua thawhlehna pualin bati nen kawng an zawh bawk.

Salvation Army corps hrang hrangte chuan an tih thin angin vartianah an band-ten rimawi hmangin Isua thawhlehna an puang a. Vartiana rimawi tum hi kum 1967-a an tih tan a ni.

Chawhma inkhawmah corps tam ber chuan thupui awm sa hmangin thuchah an ngaihthla a, chawhnu lamah Territorial Staff Songsters bakah corps eng emaw zatin mual inkhawm an huaihawt bawk.

Presbyterian Kohhran chuan leh Mizoram Baptist Kohhran bakah kohhran dang eng emaw zat chuan vartianah Easter Sunrise Service an hmang a. Presbyterian Kohhran hian chawhma, chawhnu leh zanah thupui inang tlang hmangin inkhawm an nei bawk.

Good Friday leh Easter Sunday hi Krismas anga a ni ngai hman a ni lo va, Lal Isua thih hun lai hi Judate Kalhlen Kût hman lai vel, Nisan 14 vel a ni a, hei hi March 20 hnu, April 25 hma si, thla bial lai a ni a, hemi inkara thla bial laia hman thin a ni.