Aizawl June 18, 2023 : Mizoram sawrkar chuan 24, Ashutosh Chowdhury Avenue, Ballygunge, Kolkata Mizoram House hmun tihral tumin hma a la mek a, tihralna tur tender pawh a ‘call’ tawh niin ZALEN in RTI a zawhnaah tarlan a ni.

ZALEN RTI zawhna General Administration Department (GAD)-a SPIO-in a chhan danin Mizoram sawrkar hmun, 24, Ashutosh Chowdhury Avenue, Ballygunge, Kolkata chu main road atanga  panna kawng a tel a, he lai hmun hi main road a nih loh avangin KMC Building Regulation-in inchhawng sang sak a phal lo bawk (G+3 bakin sak phal a ni lo). 

G+3 chauh sak theih a nih avangin Mizoten an tlawh tam ber, Kolkata-a G+3 chauh neih hi mipui tan a hlawk lo a; chuvangin, tihrala hmun remchang dang, zau zawk leh mi tam zawkin an chhawr theih tura ruahmanna dang ngaihtuah a ni.

SPIO-in sawrkarin tihral a tum dan a chhan danin E-procurement portal-a e-tender-cum-e-auction system hmangin tihral tum a ni a, tender pawh koh (call) a ni tawh.

Mizoram sawrkarin tihral a tum mek hmun hi March 30, 1973 atangin Mizoram sawrkar ta a ni tawh a, square metre 1,700.849-a zau niin, building thiah a nih tawh avangin hman tangkaina a awm rih lo. Kumin January atang khan tihral tuma hmalak tan a ni.