Aizawl; Ni 24, December, 2022 khan Lalhmingsanga (40), YMA Mission Veng Branch ami chu a ramvahnaah silaia kah a nih vangin a thi nia thudawn a ni. 

Zalen in YMA Mission Veng Branch hruaitute hnen atanga thu a dawn danin Lalhmingsanga  hian Lungleng ram Tlawng hnaih lamah lo ram neiin vawk a vulh tira. A enkawltute an chawlh avangin ni 20, December,2022 khan a nupui leh a fa te ber hruaiin Hunpui hmang turin an riaklut a. Krismas urlawk ni chawhnu khan an chhung hnai mipa pakhat, a unau nia an sawi nen ramvak turin an chhuak a. 

Thudawnnain a sawi zel danin ni 24, December tlai lam dar 5 velah silai puak ri hriat a ni a, a hnuah vawi khat dang hriat a ni leh a. Hmingsanga hian a chhungte phone a lak mai loh avangin midang punin zawn a ni a. Ni 25, December zing dar 3 khan thinghnuai lungpui bulah thia hmuh a ni a. YMA Mission Veng hruaitute lam chuan zing dar 4 velah chanchin hriain a hmun hi an pan nghal a ni.

"Silaimu luhna hi a taksa vei lam zel niin ka hria a, ka chhiar khan hmun 9 velah niin ka hria a. A vei lam khabeah 1, a ban veilamah 3 leh a malpui vei lamah hmun 5 niin ka chhiar a. A khabea silaimu lut hi a tlangna hnuhma a awm mai loa, hei hi a thihpui niin kan ring deuh  a ni," tiin a hmuna kal  YMA Mission Veng Branch hruaitu pakhat chuan Zalen a hrilh a ni.

Mitthi hi Zoram Medical College, Falkawnah post mortem niin a hmu hnunhnung bertu a ramchhuahpui hi Kulikawn Police Station lam chuan thu zawhfiah turin an la niin thudawn a ni bawk a. Kulikawn Police lam chuan tunah hrih chuan engmah thuchiang an la sawi thei hrih lo niin Zalen zawhna an chhanga intipalh niin an ring hrih a, he thu ziah thleng hian thubuai la ziak lut hrih lovin Police Station-ah an la kawl nia thudawn a ni bawk. 

Lalhmingsanga hian Damdiai khuaah High School Zirtirtu hna te a thawk tawh thin a, kut hnathawh nuam ti mi anih avangin zirtirtu hna hi chawlhsanin kut hnathawh lamah kalin a thihni thleng hian ‘Head Mistiri’ a ni. A nupui leh a fate 3 a kalsan a ni.