ZALEN, April 5, 2025: Kulikawn YMA-in an venga a dawr khar tura an hriattir hnuah Ramhlun North Joint Committee chuan tun hnaia ruihhlo kaihhnawiha man, an venga First Cry dawr neitu, Henry Lalbiakzinga dawr chu khar turin Inrinni khan an hriattir veleh.

Local Council, YMA, MUP, MHIP telna Ramhlun North Joint Committee chuan Henry-a nupui, Lalrammawii hnenah hriattirna hi pein ‘ram leh khawtlangin a do ruihhlo kaihhnawih hlawm lian taka sumdawng nia hriat’ man a ni chu tha an tih thu an sawi a. Hei vang hian an veng, Industry penga an dawr, Chhundeng Outfit (First Cry) chu an venga awm reng chi nia ngai lovin Thawhtanni (April 7, 2025) atangin khar nghal nise an tih thu an tar lang a ni.

Joint committee hian an venga ram leh khawtlang duh loh ruihhlo leh thil dik loa sumdawng an awm a nih chuan inthiarfihlim turin an chah nghal bawk tih an tar lang tel.

Ramhlun North-in Henry-a nupui hnena hriattirna an pekah hian LC chairman leh YMA, MHIP leh MUP president theuhvin hming an ziak a ni.

Tar lan tawh angin March 15, 2025 khan Mizoram Police chuan heroin kaihhnawihah Henry-a hi an lo man tawh.

Ramhlun North-in a nupui hnena dawr khar tura an tih hma, Ningani khan Kulikawn Branch YMA chuan an venga a dawr dang, First Cry tho chu khar turin an lo hriattir tawh a ni.