Tibetan spiritual leader, 14th Dalai Lama, Tenzin Gyatso chuan Thawhtanni tukah khan ni thum chhung cham turin Sikkim a thleng a, kum 13 zet hnua a tlawh leh hmasak ber a ni.

Himalaya tlangdung state-ah hian ‘Thirty-Seven Practices of Bodhisattvas’ zirtirin hun a hmang dawn a ni.

Dalai Lama hi Libing army helipad, East Sikkim-ah chawhma dar 10.30 velah tumin Chief Minister Prem Singh Tamang-a’n a lo dawngsawng.

Monastery hrang hranga puithiam (monk) tam takin Buddhist tih dan phungin, lâm leh tawngtai, ‘Sherbang’ an tih hmangin an lo lawm bawk.

Lo lawmnaah hian Tibetan Parliament thiah taka mi pawimawh, Sikkim-a tlan chhe mek, Tibetan Settlement Office & Local Tibetan Assembly aiawh eng emaw zat an tel bawk.

Kum 87 mi, Dalai Lama hi Gangtok-a khualbukah luhpui niin Deorali atanga Zero Point thleng a kalkawngah hian kawng sirah amah hmuh duh mi tam tak an intlar kawngtluan a ni.

Thawhlehniah hian India-China inrina, Nathula atanga km 50 vel chauhva hla, Paljor Stadium-ah ‘Thirty-Seven Practices of Bodhisattvas’ hi a zirtir dawn a ni.

“Paljor Stadium-ah hian Dalai Lama malsawmna dawng turin mi 40,000 vel an tel dawn a ni,” tiin Gangtok SP Tenzing Loden Lepcha chuan a sawi.

Dalai Lama hian Sikkim a tlawh hnuhnung ber chu kum 2010 daih tawh kha a ni.

Ral atang erawh chuan Rumtek-a Karmapa Park project leh Gangtok district-a Simmik Khamdong bial chhunga Gyalwa Lhatsun Chenpo lim din tur lung a phum tawh thung.

Gangtok-ah hian Ningani tuk thleng a cham ang a, Salugara, Siliguri, West Bengal a pan zui dawn a ni.

October thla khan Sikkim hi Dalai Lama hian tlawh tura tih a ni a; mahse, sabereka khuangkaih avanga mi tam tak thi leh sang tel baihvai an awm avangin thulh leh a ni.