Aizawl June 25, 2023 : Mizoram State AIDS Control Society (MSACS) Project Director Dr. Lalthlengliani chuan kum 2030-ah AIDS natna umbo an tum thu leh kum tin hri kai thar chu 80% a tihhniam an tum thu a sawi.

Mizoram Police, CID (Crime) ten Zirtawpni kaltaa damdawi hmanga inchiu thinte nena inkawmhona, Aizawl SP Conference Hall-a neihah he thu hi sawiin Dr. Lalthlengliani chuan, “National AIDS Control Organization kaihhruaina hnuaiah National AIDS & STD Control Program chu April, 2021 atang khan kalpui niin March, 2026 thleng kalpui a ni dawn a ni,” a ti.

Dr. Thlengi chuan he program hnuaiah hian tihhlawhtlin tur panga a awm tih sawiin, “Kum 2010 dinhmun tehnaa hmangin kum tin HIV kai thar zat hi 80%-a tlakhniamtir tum a ni a, tuna kan dinhmun hi 26% niin hmalakna tur a la tam hle a ni,” a ti.

MSACS Project director chuan heng bakah hian nuin a nau pai HIV leh Syphilis a kaichhawn tihbo, AIDS kaihhnawih avanga thihna 80%-a tihhniam, STI/RTI service quality tha tak mi zawng zawng ban phaka chhawpsak leh HIV/AIDS kaihhnawih endawngna leh thliarhranna tihbote chu an tum niin a sawi bawk.