February 8, 2024; Tukin khan Kolasib Diakkawn thlanmual bul ah PC. Lalrammawia (41) s/o PC. Lalfamkima chu thi in hmuh a ni a, a boral danah rinhlelhawm a awm nia ngaih a ni.

ZALEN thudawn danin, PC. Lalrammawia hi College Veng, Kolasib a khawsa a ni a, quarry nei niin, an chhungkua a hnathawktu ber a ni.

A ruang hi tukin khan dawr kal tur ten an hmu a, kawngsir ah lo letin, an hmuh hian a lo khawng tawh a, nizan (7.2.24) lam a thi nia ngaih a ni.

A ruang bulah hian inchiuna syringe hmuh a ni a, hetihlai hian PC. Lalrammawia chanchin an chhuina ah inchiu hlau tak a nih thu te, damdawi khawih ngai lo a nih thu te hriat a ni thung.

Hetiang a nih vang hian a chhungte ngen angin a ruang hi Kolasib damdawiin postmortem a ni a, endik ngai awm te pawh endik turin Forensic lam ah lak a ni. Kolasib police te pawhin thil awmdan an chhui zui mek zel nia thudawn a ni.

A ruang hi zaninah lumen a ni ang a, naktuk chhun dar 12 ah vui a ni ang.