ZALEN February 2, 2025 : Mizoram Police chuan kum nga kalta (2020-2025) chhungin thubuai 17,070 an ziak lut a. Thubuai ziah luh zinga 13,675 hi IPC/BNS hmanga ziah luh a ni a, a dang 3,395 hi non IPC/local (special law) hnuaia ziah luh a ni.

Mizoram Police hian kum 2020-ah thubuai 2,317 ziak lutin heng zinga 1,804 hi IPC hnuaiah niin a dang 513 hi non IPC hnuaiah a ni a. Kum 2021-ah thubuai 3,198 ziak lutin hengte hi IPC hnuaiah 2,486 leh non IPC hnuaiah 712 a ni a. Kum 2022-ah thubuai 4,273 ziak lutin IPC hnuaiah 3,699 leh non IPC hnuaiah 574 a ni a. Kum 2023-ah thubuai IPC 3,338 leh non IPC hnuaiah 763 ziak lutin hemi kuma thubuai ziah luh zawng zawng chu 4,101 a ni.

Nikum khan IPC/BNS hnuaiah thubuai 2,348 leh special law hnuaiah thubuai 833 ziak lutin nikum chhunga thubuai an ziah luh zawng zawng hi 3,181 a ni.

IPC bikah hian police thubuai ziah luh zingah rukruk/mi rawk thubuai chu a tam lawr lak a. Kum nga kalta chhung hian rukruk/mi rawk thubuai hi 9,491 ziah luh niin hei hi kum nga chhunga IPC hnuaia thubuai ziah luh zawng zawng 13,675 atanga chhutin 69.40% a tling pha hial a ni.

Case langsar ziah luh zingah tualthah case bikah kum 2020-ah case 30, 2021-ah 24, 2022-ah 31, 2023-ah 25 leh 2024-ah case 24 ziah luh a ni a. Pawngsual thubuai hi kum 2020-ah 36, 2021-ah 25, 2022-ah 16, 2023-ah 28 leh nikum 2024-ah case 19 ziah luh a ni.

Tualthah tum thubuai hi 2020-ah pakua, 2021-ah 19, 2022-ah 19, 2023-ah 18 leh 2024-ah 18-te ziah luh a ni.

Special Law/non IPC hnuaiah hian zu khapna dan bawhchhiatna (prohibition/MLPC Act) hnuaia thubuai ziah luh a tam ber a, kum nga kalta chhungin thubuai 1,328 ziah luh niin hei hi non-IPC hnuaia thubuai ziah luh zawng zawng atanga chhutin 39.11% a tling.

Ruihhlo (damdawi) kaihhnawih thubuai ziah luh chu pahnihna niin ND&PS Act hnuaiah case 1,086 ziah luh a ni a, hei hi thubuai ziah luh atangin 31.98% a tling a ni.

Non-IPC hnuaia thubuai ziah luh zingah hian 274 leh zu khaihhnawih (prohibition/ MLPC Act) hnuaiah thubuai 289, a vaiin thubuai 563 ziah luh a ni a. Hei hi nikum chhunga non IPC hnuaia thubuai ziahluh zawng zawng atanga chhutin 73.78% a tling a ni.

Non-IPC hnuaia thubuai ziah luh zingah POCSO case chu pathumna niin kum nga kalta chhungin POCSO Act hnuaiah thubuai 599 ziah luh a ni bawk.