Kuwait hruaitu, Emir Sheikh Nawaf al-Ahmad al-Jaber al-Sabah chu kum 86 mi niin a thi tih Kuwaiti sorkar TV-in a puang.

Sheikh hian tuialhtheia hausa ram hi a unaupa (half-brother), Sheikh Sabah al-Ahmad al-Sabah-a kut atanga la chhawngin kum thum a hruai hman.

Crown prince kum 83 mi, Sheikh Mishal al-Ahmad al-Sabah chu a aiawh tur a ni ang.

Kuwait chuan ni 40 chhung sun turin an ti a, sorkar pisate pawh ni thum chhung an khar dawn.

“Sheikh Nawaf al-Ahmad al-Sabah-a thihna hi chânna nasa leh lungngaihna thuk tak a ni a, kan sun a ni,,” tiin sorkar TV chuan thuchhuah a tar lang.

Sheikh Nawaf hi kum 2006 khan crown prince atan puan niin kum 2020 atang khan emir a ni tan.

Kum 1937-a piang a ni a, Kuwait-a roreltu thin, Sheikh Ahmad al-Jaber al-Sabah-a fa pangana a ni.

Iraq-in kum 1990-a Kuwait a rûn lai khan defence minister a ni a, kha inrûnna kha Gulf War intanna niin a hnuah interior minister a ni leh bawk.

A thlak tak, an rama kum 10 chuang roreltu, an foreign policy kum 50 daih tur duangtu, Sheikh Nawaf nen khaikhin an ni thin a; mahse, ani chuan ro a rel rei ve ta lo thung.

Kuwait-ah hian mihring maktaduai 4.8 chauh an cheng a, an zinga maktaduai 3.4 zet chu ram dang mi, an rama hna thawk an ni nghe nghe a. Khawvela tuialhthei ngah ber ram parukna an ni phak thung a, US thian tha a ni bawk.

An lalrama parliament chu Gulf-a thlan ngai rorel khawm thlannaah a thu ber an ni a, eptu MP-te pawhin Sabah an sawisel nasa thei hle bawk.

Rorel khawl nei ve bawk mah se lal chhungkua hian sorkara chanvo pawimawh an chang vek a, emir hi politics-ah chuan a sang ber a ni a. Parliament thiah leh an rel tawh thiah theihna a nei a, inthlan a huaihawt thei bawk.