Kum dang aiin Tlawng a nu
Tualchhung Tinreng
Jul 01, 2023
ad
ad
Kum tin fur intan tirhah Mizoram lui tui te hi a nu but but thin a, mahse a hnu deuhah erawh a ziaawm chho ve leh mai zel a. Aizawl khawpui tuilakna Tlawng lui chu kum dang aiin a nu zawk a, hei vang hian Public Health Engineering department chuan tui pump kawngah harsatna an tawk.
 
Zalen in PHE thawktute hnen atanga thu a dawn danin mipui hnena sem tlaka ngaih tui hi a nut lam tehna Nephelometric Turbidity Unit (NTU) 5 te anih laiin Tlawng tui nut zawng hi a tehna NTU ah 1778 te a thleng hial a, hei vang hian engemaw lai kha chuan tui pump leh sem kawngah harsatna an tawk niin an sawi a. "Tui a nut lutuk chuan tih thianghlim a buaithlak a, tih thianghlim chhung a rei bawk a. Mipui ei tlaka chhuah tur chuan tih tur a tam avangin tui sem kawngah harsatna kan tawk ta thin a ni," tiin Er. C.Zothantluanga, Executive Engineer AWTD chuan Zalen a hrilh.
 
Tlawng lui nut chhan chu hre chiah lo mahse leivung paih a ni thei tih sawiin PHE thawktute chuan, "Tlawng kawngsirah a ruka leivung paih an la awm reng vang leh hmun danga leivung awm te chu luiah luang lutin tui a ti nu thin a. Kum dang aiin kumin hian Tlawng tui hi a nut nasat bakah a nu rei bawk a ni," an ti a. Tun dinhmunah tak erawh tui nu hi a ziaawm nia sawiin nakin deuhah enge a an zel ang tih erawh an sawi thei bik lo niin an sawi. PHE thawk te chuan leivung hi direct in Tlawng ah hian paih lo mahse a fintu lui velah leivung a awm chuan ruahtui hian a len lut a, a lo nu ta thin niin an sawi bawk. 
 
Tun dinhmunah chawhrualin PHE hian Aizawl khawpui tan tui litre maktaduai 27 atanga 30 inkar an pump thin a, hei hian mipui duhkhawp a tling lo a. Nitin litre maktaduai 35 pump thei sela chuan hnianghnar zawkin mipui ah tui an sem theih beisei a ni. 
 
Tlawng lui mai bakah hian Mizoram chhunga lui hrang hrang te chu a nu hle a, hei hi a chhan ber chu lui ah hian leivung a luh hnem vang niin mithil chikmi te chuan an sawi a. Khaw engemaw zat chuan tunhnai khan tui sem tur an nei lo hial a ni. Mizoram hmun hrang hrangah kawnglaih a tam a, heng kawnglaihna leivung te hi kawng laitu ten a paihna hmun tura ruatah paih lovin a remchang ang anga nawrliam an neih thin vang niin an sawi. 

Latest News & Chhiar Hlawh