Chelsea chuan Cucurella manah Brighton chu pound million 55 pein Chelsea player nghet turin an ziak lut. Marc Cucurella hian vawiin lam khan training a zawm hman beisei a ni a, a duh chuan naktuk zan Premier League-ah Everton a hmachhawn thei ang. 

Cucurella hi La Masia a sei lian niin Jose Luis Mendilibar-a hnuaiah Eibar lamah a zir chhuak a, a hnuah Jose Bordalas-a'n Getafe-ah a hmang zui leh. A khelh tawhna club te hian Cucurella hi left-midfielder angin an chhawr hlawm a, Brighton lam erawh defence-ah an hmang thung. 

Position hrang hrangah rintlak taka a khelh theih vangin player duhawm tak a ni a, tin inkhelh laiin mual chhungah a rilru a fim thei hle tih a chet zia atangin a hriat theih thin. 

November thlaa khelh tur World Cup tana inbuatsaih mek Spain manager Luis Enrique-a pawhin squad tur player a thlang chho mek a, Chelsea lama a lut hi Cucurella hian a chhawr tangkai dawn em tih chu hunin a hril ang.