Aizawl June 9, 2024 : Mizoramah kumin chhungin ruihhlo vanga thi mi 40 an awm tawh a, kumin 1984 atanga kumin thlenga ruihhlo vanga thi chhinchhiah tawh zat chu mi 1,850 an tling tawh.

Excise & Narcotics department (END) chhinchhiah danin kumin (June 6) thlenga ruihhlo vanga thi chhinchhiah tawh zat chu mipa 33 leh hmeichhia pasarih, an vaiin mi 40 an ni.

Kum 1984 atanga END-ten an chhinchhiah tawh chinah kumin thlenga ruihhlo thihpui tawh zat chu mipa 1,624 leh mipa 226, an vaiin mi 1,850 an tling.

Mizoram Police-ten June 1, Inrinni zinga ‘Walk for Drug Free Mizoram’ an huaihawtah Chief Minister Lalduhoma chuan ruihhlo vangin tun hnaiah Mizo thalai, a bikin mipa an thih nasat thu leh hmeithai leh fahrah an tam phah thu a sawi a, “Hei hian Mizote hi hnam dam rei lo pawl tak min nihtir a, thlanmualah thalai thlan a tam em em. Hetiang zela kan kal chuan kan hnam hian a la tuar hle dawn a ni,” a ti.

Home Minister K Sapdanga pawhin ruihhlo vangin Mizo thalaite an thi tam tawh tih sawiin, “Namenloa kan do a ngai. Drugs zuartute leh a buaipuitute hi mi tam an ni lo a, a nghawng erawh chu mi tam tak kan ni thung. Tangrual ila, a vaia a rem thei lo a nih pawhin a ziaawm thei a ni,” a ti a. Sawrkar, khawtlang, kohhran, chhungkua, sikul leh tlawmngai pawlte an tanrual a tul thu a sawi.