Aizawl September 8, 2024: Mizoramah kumin chhungin ruihhlo vanga thi mi 52 an awm tawh a, kum 1984 atanga kumin thlenga ruihhlo vanga thi chhinchhiah tawh zat chu mi 1,862 an tling a. Hetihlai hian tun laiin tleirawl zingah ganja a hluar nia ngaih a ni.

Excise & Narcotics department (END) chhinchhiah danin kumin (January-September 6) thlenga ruihhlo vanga thi chhinchhiah tawh zat chu mipa 45 leh hmeichhia pasarih, an vaiin mi 52 an ni.

Kum 1984 atanga END-ten an chhinchhiah tawh chinah kumin thlenga ruihhlo thihpui tawh zat chu mipa 1,636 leh hmeichhia 226, an vaiin mi 1,862 an tling.

END chuan tun laiin tleirawl thenkhatin ganja hman an ching hle tih tar langin, ganja chu state thenawm, Meghalaya leh Tripura atanga Mizoram chhung lo lut a nih ber thu an tar lang.

Ganja phurh kual, neih, kawl, zawrh leh hman te bakah in bul huan emaw, lo lama ganja chin chu ‘The Narcotics Drugs & Psychotropic Substances Act, 1985’ tlawhchhana thubuai lian tak neih theihna a nih avangin ganja laka fihlim turin mipuite an hriattir.

Hetih lai hian nikum 2023 kha Mizorama ruihhlo man tam ber kum a ni a, police leh END-te heroin man belhkhawm chu kg. 144 leh gram 113 a tling.

Methamphetamine hi nikum khan police leh excise hian kg. 253 leh gram 678 an man bawk a. Nikuma police-in crystal meth an man hi kg 49 leh gram nga a ni a, a hun lai khan Rs. Vbc. 147.01 hu anga chhut a ni.

END bikin kumin January leh May thla inkar chhung khan ruihhlo chi hrang hrang kaihhnawihah mi 3,130 an man a. Nikum chhung khan ‘Narcotic Drugs and Psychotropic Substances, 1985’ hmangin thubuai 725 an ziak lut a, mi 1,088 an man a. Nikuma ruihhlo leh zu vanga an man zinga 83 chu ram dang mi an ni.