DOWNLOAD OUR APP

Read latest news on your phone
app-store

Lal atan Charles-a puan a ni ta

Sep 11, 2022

Charles III chu Inrinni khan St James’s Palace-a inkhawm buatsaihah an ram lal atan puan a ni ta. Charles hi a nu, Queen Elizabeth II a thih chiah khan lal a ni nghal a; mahse, tih dan thin pangngai angin lal atan puan a ni ta chauh a ni.

Charles III chu Inrinni khan St James’s Palace-a inkhawm buatsaihah an ram lal atan puan a ni ta.

Charles hi a nu, Queen Elizabeth II a thih chiah khan lal a ni nghal a; mahse, tih dan thin pangngai angin lal atan puan a ni ta chauh a ni.

Accession Council-ah King chuan Queen vui ni chu bank chawlh a nih tur thu a puang nghal a, a ni tur erawh hriat theih a la ni lo.

Tun hi lal puan a nih lai TV-a tihchhuah vawi khatna a ni.

King hi inkhawm tan lai hian a tirah a awm lo va; mahse, a thawh hnihna inkhawmah erawh a vawi khat nan Privy Council-ah a tel a, hei hi politician hlun tak tak awmna niin lal hnena thurawn petu a ni.

Privy Council Clerk Richard Tilbrook chuan Charles chu ‘King, Commonwealth lu ber, rinna vawng himtu’ tiin a puang a, ‘God Save the King’ tiin a sawi zui.

London-a State Apartments of the Palace-a lal atana Charles-a puan a nih inkhawmna pindanah hian politician hlun tak tak, judge leh sorkar mi pawimawh te an tel.

Lala an puanna tur thu hi King hian a phuah a, hetah hian a nu a thi tih puangtu a ni tur chu ‘mawhphurhna lungchhiatthlak’ tiin a tar lang.

Inkhawmah hian Privy Council member 200 an tel a, an zingah hian prime minister hlui - Boris Johnson, Theresa May, David Cameron, Gordon Brown, Tony Blair leh John Major pawh an tel.

Lal atana puan a nih zawhah hian St James’s Palace tualah ‘God Save the King’ tia au thawm a ri nghal chuah chuah a, mi sang tel pungkhawm chuan an hnam hla an sa a ni.

King Charles III-a lal atana puan lai television camera-a laka mipuiin an lo hmuh theih nan Accession Council chuan a vawi khat nan  tih a phal a ni.

Queen Consort

Charles-a lak luh a nih rual hian British mipuite chuan Queen Consort thar an nei ta a. Ani hi Charles-a’n a hmangaih tak, thalai an nih lai atanga a lo kawp tawh leh kum 17 chhung a nipui lo ni tawh a ni.

Camilla-i hi a pasal lal a nih hmain ram chhung leh ram pawna hun pawimawh hmanna leh thil lawmna hrang hrangah an inzui nasa hle a; mahse, mipui nawlpuiin Consort atana an pawm thlap erawh a harsat rin a ni.

Hmeichhe tam tak phei chuan Camilla Parker Bowles-i hi an ngaina lo thin a, hei hi a chan ber chu Charles-a nupui hmasa, Diana, Princess of Wales nena an la khaikhin tlat vang a ni a. Charles-a leh Diana-i an inthen chhan nia puhin, ‘hmeichhe dang’ hmuhin an la hmu tlat a ni.

Hetiang hian mipuiah tla na tawk lo mah se Charles-a’n a thlan a nih miau avangin amah pawhin a tuang a tichhah a. Kum tam tak chhung chu chanchinbumi te, a nun dan thil hrang hrangah beih a tawk a; mahse, heng beihna hi huai taka paltlangin tunah erawh chuan lal chhungkua bikah chuan hmeichhe zinga thunei ber pawl leh langsar ber pawl a tling tawh.

Prince Charles-a nen hian kum 20 chuang awrh an nih atanga inhmelduh tawh an ni.

Queen Elizabeth II khan mo atan a pawm mai lo va; mahse, a hun tawp lamah erawh Camilla hi a ring tawh hle nia sawi a awm.

Tunah chuan tawngkam dangin, Queen thar a ni dawn ta a, vantlangin chuti mahin pawm lo mah se kumin kumtira Vogue-in an kawmnaah chuan, “Chutianga min sawina chung daihah chuan ka leng a ni,” a ti.

Camilla Rosemary Shand-i hi July 17, 1947-a piang niin chhungkaw sang ta, hausa leh lal chhungkua nen pawha inhnaih tak an ni.

Sussex-an an chhungkaw in lian takah a sei lian a. A pa, Bruce Shand hi Army officer thin niin a nu, Rosalind-i enkawlna hnuaia sei lian a ni a. Charles-a nen chuan an naupan lai hun a inang lo hle a, ani hi chu a nu leh a pa lal an nih miau avangin an awm hman meuh lo va, khawvel ram hrangah an zin kual reng a ni.

Switzerland-ah lehkha zirin a zir chhuah hnuah Camilla-i chu London-ah a khawsa zui a. Kum 1960 chho velah Household Cavalry officer Andrew Parker Bowles nen inzuiin thawm pawh an nei ve hat thin.

Kum 1970 chho khan rawlthar mai la ni, Prince Charles-a nen an inhmelhriat tan a, a hnu lawkah Charles-a hi tuipui sipaiah tangin tuipuiah a khawsa a, hetih hlan hian Bowles nen an lo innei ta a ni.

Kum 1981-ah Charles-a pawhin nupui a nei a; mahse, a hnuah intawng lehin an kawppui ve ve thenin an innei zui ta a ni.

Share now