24 June 2023: Vawiin khan Lamka-ah zirlai pawl tangrualte chuan Manipur buaina chhuaka tlangmi nunna chante sunna leh hriatrengna hun an hmang a, nunna chan tawhte entir nan mitthi kuang lem/ruak 100 zawn a ni bawk.

He hun hi Coffin Rally tia vuahin District Hospital morgue atangin kawng an zawh tan a, an thuchhuahin a tarlan danin mi sang tam tak he hunah hian an tel a, 3 km ke a  kalin Peace Ground, Tuibong (Lamka district mini secreteriat bul) ah an tawp a ni.

Nunna chan tawhte entir nan mitthi kuang lem/ruak 100 mi thenkatin an zawn a. An paltlangna hmun thenkhatah van lam hawi zawngin silai hmeh puah diat diat a ni leh zel a, Peace Ground, Tuibong ah innghatin kuangah hian pangpar dah a ni bawk a. Rev S. Vunminthang chuan tawngtai leh thusawiin hun a hmang a, kum upa lamte'n tahna hla an chham bawk a ni.

Ruahsur hnuaia Tuibong punkhawmnaah hian tharum thawhna tuartu zing amiin a thil tawnte sawi chhuakin he hun huaihawttu zirlai pawl tangrualte chuan thu an sawi bawk.