Aizawl January 5, 2024: Thingsai khua chuan nimin leh vawiin January ni 5 hian Government High School tual, Thingsaiah Saikhawpui Kut’ an hmang. Saikhawpui Kut hi khaw dangin Haw Runpui an tih ang hi a ni. Kut thupui atan hian – ‘Zirna leh Taimakna’ tih hman niin, Thingsai chhuak P. Rohmingthanga IAS (Rtd) fapa Justice Michael Zothankhuma, Gauhati High Court chu Kut pa niin, Khuallian pathum awmin, Thingsai khaw chhuak vek - Vanlaldiki Sailo, Commissioner, Persons with Disabilities (PwD); Liankima Lailung, Chairman, Mizoram Pollution Control Board leh Er. Lalrinkima Hnamte, Engineer in Chief, PWD te an ni.

Vawiina Kut hmannaah hian Thingsai khawchhuak mi hmingha 11 te hnenah ‘Saitlang Rohlu Chawimawina’ thuziak hlan an ni. Chungte chu - P. Rohmingthanga IAS Rtd ; K. Thanfianga, Ex-Deputy Speaker ; K. Pakunga, Thingsai Historian ; P. Lianchhuma IPS Rtd ; Pu M. Tumsanga IPS Rtd ; P. Lalbiaka, Ex-Minister; Evan K. Lianthanga, Environmentalist ; F. Vanlalnghaka, Ex-Minister ; Lalsangzuali Sailo, Padmashree Awardee ; F. Hranghlira, MPS leh Zira Hnamte, zai leh hla phuahthiam te an ni.

Saikhawpui kut hmang tur hian Mizoram chhung leh ram pawn atangin mikhual 500 vel an kal khawm a ni. Kut pual hian Saitlang Romual-ah Lungphun a ni a, He lungphun hi K. Lalrengpuii, Treasurer, TWC Aizawl chuan a duh apiangte tlawh leh thlalakpui theih turin a hawng a ni.

Saikhawpui kut hi January ni 4 zan khan Thingsai Lal ‘Lalbuana Zan’ hman a ni a, Lalbuana’n zirna kawnga a hmalakna kawng hrang hrang te F. Lalzawmliana, Lalbuana tupa chuan a sawilang a. Vawiin January ni 5 chawhma khan ‘Pu Lena Hun’ hman a ni. Selthuama, Lena tia hriatlar hi Thingsaia Middle English School Headmaster hmasa ber niin, a fate chu P. Rohmingthanga, IAS ; P. Lianchhuma, IPS leh P. Lalbiaka Ex-Minister te an ni a. Thingsai tana zirna leh rimawi lama Lena sulhnu leh kutchhuak ngaihnawm tak F. Aihnuna ziak chhiarchhuah niin School naupang ten hnam lam hmuhnawm tak an entir bawk.

Saikhawpui Kut lawm nan hian vawiin tlai lamah F. Hranghlira Memorial Ground-ah vantlang Ruai theh tur a ni a. Mi 3000 ei tur ruai buatsaih a ni. Saikhawpui kut hi zanin hi a tiak dawn a, a hmun ngai High School tualzawlah Zirtirtu Chalbuanga Zan hman tur niin Vanlaldiki Sailo, Commissioner- Persons with Disablities (PwD) chu Khuallian a ni ang. Hmingthansanga’n (Matea) Thingsai zirnaa Chalbuanga Sulhnu tih a sawi ve thung dawn a ni.