India-a Uttarakhand state-a leiverh chima tang mi 41-te chhanchhuah hna thawh mek chu eng emaw harsatna a awm hnuah chhunzawm leh tawh a ni tih thuneituten an sawi.

Tangte hi Ningani zanlai velah chuan an lak chhuah theih hman an inbeisei.

November 12-a leiverh bula lei min avangin thawktute hi an la tang ta ngar ngar a ni.

Nilaini tlaiah khan lak chhuah tuma thawh hna hi a verhna khawl chuan thir (steel) a tawng fuh a, a kaltlang theih loh avangin buaina a awm hman.

Bei chhunzawm zelin a hnawhtu lei tla khawm zinga hmun lia thena hmun hnih an verh tlang thei tawh a, Ningani tuka verh tlang hman kha an beisei a ni.

Gas-cutter hmangin a dangtu steel hi tihchah leh phawt a ni a, hemi hna thawh chhung hi darkar ruk vel lai a nih avangin an tum angin an zo hma thei lo.

“Ruahman anga thil a kala harsatna kan tawk lo a nih chuan zanah chuan kan lak chhuah theih kan inbeisei,” tiin National Disaster Response Force (NDRF) Director General Atul Karwal chuan Ningani tukah khan BBC Hindi a hrilh.

Karwal-a hian harsatna dang an lo tawk leh a nih pawhin hmachhawn turin thuneitute chu an inpeih tih a sawi bawk.

“Heng mite hi kan la chhuak ngei dawn,” a ti.

Thuneitute hian mi tangte hi leiin a chhilh hnan hnu lawkah an bepawp zui nghal thei a. Hna an thawh laia tui lak luh nana an hman pipe hmangin oxygen, ei tur ro leh tui an pe lut thei bawk.

Biakpawh reng an ni a, an hriselna dinhmun pawh ngaihtuah reng a ni bawk.

An thian tha leh an chhungte pawnah chanchin ngaichangin an nghak reng a. Kar tir lamah khan endoscopic camera rawlh luh hmangin an hmel pawh hmuh theihin tihchhuah a ni.

Ningani tukah khan Karwal-a chuan Uttarakhand Chief Minister Pushkar Singh Dhami-a’n zingah mi tangte hi a bia tih a sawi a, an nun pawh a zangkhai hle tih a sawi.

“Chhanchhuah an ni thuai dawn niin an inhria a ni,” a ti.

Thuneitute hian leiverh hnawhtu, metre 60 vela chhah hi verh tlanga chutah chuan pipe dang rawlha tangte hi vah chhuahtir tumin ruahmanna an siam a ni.

Chhanchhuah beihpui an thlak hi ni eng emaw zat an thawh hnuah lei a ngheh loh avang te, lung a chan avang leh lei tla a la awm reng avangin a khaihlak nasa hle.

Excavator hmanga lei leh lung tla then fai hleihtheih a nih loh hnuah hmun dang atangin American siam leiverhna hmanrua (auger drill) chah niin thawh chhunzawm a ni a. Hmanraw chak zawk hmang hian a khawl vir chak tak hian lei leh lung tam tak chu awlsam takin a hnawl zung zung thei a ni.

Lak chhuahna tur pipe lian hi mi tangte hnen thleng an rawlh luh theih hunah chuan doctor thawn lutin an dinhmun a enfiah hmasa dawn a ni.

Ambulance pawh leiverh tualah hian inrintir a ni a. Thuneitute hian thawktute hi him taka an lak chhuah theih ngei an tum a, an lak chhuah hunah a rang thei ang berin damdawi inah dah luh nghal tura ruahman a ni.