India hmar lam, Uttarakhand-a leiverh chima thawktu tang mi 41-te chhanchhuah tuma beihna chu a ni nga vel emaw lai a khaihlak ta a, a hnawhtu lei tlate verhna khawl (drilling machine) a chhiat avangin kutlawngin hai zui a ni dawn.

Chhanchhuah hna thawktute hian lei verh tawh chhunga khawl chhia tang lak chhuah a nih veleh kutlawngin a rem dan angin an hai zui dawn a ni.

Leiverh hi lei minin a hnawh avangin a chhunga awmte hi chawlhkar hnih lai an tang tawh.

Chhanchhuah tuma beihna hi a hautak a, a hnawhtu zingah hian lung leh thir lam chi tam tak a awm avangin hna a khirh hle.

Thawktute hian leiverhna hmanrua (auger) chu thir karah a tan avangin an la chhuak thei mai rih lo va, khawl dang chaha nghah ai chuan a tang hi lak chhuaha kutlawnga hai mai a sawt zawk niin an sawi.

Leiverh lama mi thia, chhanchhuah hna thawhnaa puitu, Arnold Dix chuan, “Khawl hi a chhia a, siam that theih pawh a ni lo va, a buaithlak hle a ni,” a ti.

Hetih rual hian Dix-a hian mi tang 41-te hi him taka an lak chhuah theih ngei a inring hle a, an hnen thlenna tur ‘kawng tam tak a awm’ niin a sawi.

Himalaya tlangdunga Silkyara tunnel hi km 4.5-a thui niin a siam hna thawktute a chhunga an awm mek laiin November 12 khan lei min hian a hnawh.

An tan hnu lawkah tangte hi biakpawh zuii theih nghal an ni a, oxygen, ei tur leh tui pawh pek theih an ni bawk.

Chhanchhuah tuma beitute pawh hian an pawh teuh tawh hle a, metre 9 emaw vel chauh an karah a awm tawh tihin auger hi a chhe ta hlauh a ni.

Uttarakhand Chief Minister Pushkar Singh Dhami chuan Inrinni khan drilling machine chhia hi Pathianni tukah chuan lak chhuah hman a nih tur thu leh hemi hnuah hian thawktuten an theih ang angin an hai zui dawn tih thuthar lakhawmtute hnenah a sawi.

Dhami chuan mi tangte hi a bia tih a sawi a, “An nun pawh a zangkhai a, ‘Min lak chhuah nan ni la mamawh deuh dawn mah ula, keini chu min ngaihtuah suh u,’ an ti,” tiin a sawi bawk.

Lak chhuah mai theih la ni rih lo mah se leiverh pawnah hian ambulance chhawp reng a ni a, thuneitute chuan mi tangta hi him taka lak chhuah an nih veleh a rang thei ang bera an bul hnai damdawi ina lak nghal theih turin a ruahman a ni.