DOWNLOAD OUR APP

Read latest news on your phone
app-store
LEIVERH CHIM: Ni 17 hnuah mi tang 41-te lak chhuah theih an ni ta
Nov 28, 2023

Chhanchhuah hna thawktuten ni eng emaw zat an lung, concrete, chirh leh thir sut tlang tuma an beih hnuah India hmar lam tlanga leiverh chima thawktu mi 41-te chu Thawhlehni zan khan an him takin lak chhuah an ni ta a. Ni 17 zet leiverh chhungah hian an tang hman.


Anmahni chhanchhuah tum hian nasa taka beih niin harsatna chi hrang hrang an tawk a, an chhuahna tura an verh pawhin anmahni a pawh hma lawkin an su tlang zo lo va. Thawhlehni zanah khan centimetre 90 (feet thum)-a zau thir (steel) pipe hmangin Himalaya tlangdunga Uttarakhand-a tangte hi chhanchhuah an ni ta a ni.


Anmahni lak chhuah chhung tak hi darkar khat chuang awrh a ni.


India-a state rethei tak tak atanga hlawm tlem hlawh tura thawkte hi km 4.5-a thui tur lei verh hnaah hian an inhlawh a, lei minin November 12 tuka a hnawh tak avangin an chhuak thei ta lo va, an tang ta reng a ni.


Chief Minister Pushkar Singh Dhami chuan lak chhuah an nih hnuah hian an zinga thenkhat chu lo dawngsawngin damdawi in panpui nghal an ni a, hnam tihdanin parthi a lo awrhtir bawk a. Leiverh bulah hian a hma atang tawhin ambulance leh helicopter inrintir sa a ni.


Taksa tha taka tangte lak chhuah an nih hnuah a lawm nan chithlum sem a ni a, halmawi pawh hal a ni tih a hmuna awm thuneitute chuan an sawi.


Chhanchhuaktu zinga pakhat, Devender chuan, “Leiverh chhunga an awm lai zu hmuh an nih chuan an lo hlim hle a, thenkhat chu ka lam pana lo tlanin min rawn kuah a ni,” tiin NDTV hnenah a sawi.


Mi dang pakhat, Vakil pawhin, “Kan lak chhuah hma loh chuan nileng zankhuain kan thawk ang tiin thutlukna kan siam a ni,” a ti.


Union Road Transport Minister Nitin Gadkari chuan, “Silkyara tunnel chima tang mi 41-te him taka lak chhuah an ni ta hi ka hahdam huai a ni,” a ti a. “Tun hnai kum eng emaw zat chhunga chhanchhuah hna thawh khirh leh pawimawh berah hian agency hrang hrangte thawhhona thatzia a lang a ni,” a ti bawk.


Mi tangte chhanchhuah nan hian ‘rat-hole mining’ tia an sawi mai hmangin sipai engineer-ten hma an la a. Hetiang hi kutlawnga hai a ni ber a, khawl hmanga an verh bak metre kua (feet 29) vel chu tlang sangah, hmun vawt takah kutlawngin an hai zui a ni.


Thuneitute chuan a hmain mi tangte hi an him a, êng an nei tha a, tui leh damdawi pawh pipe hmangin an pe tih an sawi a. Ni eng emaw zat snack vel chauh an pek theih hnuah cm 15-a zau pipe an rawlh lut thei a, heta tang hian chaw lum pawh an pe zui thei ta bawk a. A hmain pipe dangin oxygen an pe lut reng bawk.


International Tunnelling & Underground Space Association President Arnold Dix pawhin chhanchhuah hna thawktute hi a vil reng a, thawktute hi an rilru pawh a thla a muang a, an tan chhung khan ‘cricket pawh an khel’ niin a sawi.


An tanna leiverh hi $ tluklehdingawn 1.5 zet senna tur, Char Dham highway zinga mi a ni a. He kawngpui siam hna hi Prime Minister Narendra Modi-a’n heng lai hmuna Hindu hmun thianghlim palite tlawhpawh zung zung a awlsamna tura a tih niin kawngpui hi km 890-a thui tur a ni.


Mi thiamte chuan kawngpui hi Himalaya tlang dunga kal tur a ni a, lei a nghet lo va, khaw tam tak chu lei min tla khawma awm mai mai an nih avangin a sial a hautak dawn niin an sawi lawk nghe nghe.


Thuneitute chuan leiverh chim chhan hi engmah an sawi lo va, heng lai hi lei min, lirnghing leh tui lian a tam duhna lai a ni.


Sorkar chuan khuarel tichhe thei lo ri hmanga leilung zirna an hmang a, lei nghet tha lai zel an thlang niin an sawi a. National Highways Authority of India hnenah India ram hmun hrang hranga leiverh 29-te dinhmun endik turin a ti nghal bawk.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh