India hmar lam, Uttarakhand-a leiverh chima tang hnathawktu mi 41-te chu ni kua zet an tan hnuah a vawi khat nan thlalaknain an thla lak theih a ni ta.

Video hi Thawhtannia pipe verh luh atangin endoscopic camera hmangin lak a ni.

Chhanchhuah hna thawktute chuan pipe hmang hian ni tam tak hnuah chaw lum pek theih an ni ta bawk.

A hma chuan pipe tê tak hmangin snack vel pek thin an ni.

Leiverh siam lai hi lei minin a hnawh phui mek.

A chim hi Thawhtanni tuk kha niin Uttarkashi district-ah a ni a. A hnu lawkah biakpawh theih nghal an ni a; oxygen, ei tur leh tui pek luh an ni bawk.

Thawhtanni tlaiah khan a hnawhtu hi verh tlang theih a ni ta a, pipe inches ruka lian rawlh theih a ni ta a ni.

Thuneitute chuan hrui fân thei hmangin thlalakna tê rawlh lutin a chhunga tangte hi an thla an laksak thei ta a ni.

Video tihchhuahah chuan chhanchhuah hna thawktute hian pawn lam atangin computer screen-ah an chetla hi an hmu thei a ni.

Thuneitu pakhatin thlalakna hmaa inlan turin tangte chu a ti a, an nui a, an ban an vai bawk a; pawn lam atanga tih dan tur an dawn ang zelin an ti tih a lang thei.

Chhanchhuah an nih tep thu leh thlalakna hmaa a mal tete-a inlan theuh turin a ti bawk.

Chhanchhuah hna thawktute hian two-way radio hmangin mi tangte hi an bepawp a, video tihchhuahah pawh hian tang zinga pakhatin walkie-talkie a keng hmuh tur a awm.

Mi tangte hi a tam zawk chuan safety helmet leh jacket an inbel a, thlalakna hmaah hian a kual (semi-circle)-in an ding tlar.

A betu thuneitu hian pipe chu an tifai ang a, tui pek luh nan an hman tur thu a hrilh bawk.

Tang thiante chuan ni rei tak hnua an thawhpuite hmel an hmu leh thei chu an lawm hle tih an sawi.

“Thlalakna atang chuan ka hmu ta a, a tak ngeia hmuh hlan ka nghakhlel tawh hle a ni,” tiin tang zinga pahnih thianpa, Rahul Ameen chuan a sawi.

Ameen-a hian leiverh hi a tlawh deuh reng a, chhanchhuah hna thawhin eng chen nge a thlen tawh hriat tuma a ngaihven reng thu a sawi.

Pipe thar an rawlh luh hi November 12-a a chim hnu lawka inches lia lian pipe an rawlh luh aiin a lian zawk.

Pipe hmasa hi a tet em avangin snack leh thei ro vel chiah an thawn lut thei a. Oxygen pek luh nana hman a ni bawk.

Thuneitute chuan pipe thar hi a zau deuh tawh avangin oxygen, ei tur leh an mamawh dang - damdawi, mobile phone leh charger pawh pek luh a awlsam tawh dawn niin an sawi.

Chhanchhuah hna thawktute hian an tan hnua a vawi khat nan ei tur lum, buh leh dal, khichdi an tih chu uma dahin an pe lut thei ta bawk.

Mi tangte chhanchhuah hna thawh hi Thawhlehni kha a ni 10-na a ni ta a, chhiatna thlenna lai hi lei nghet lo lai leh lei tla a la awm rengna a nih avangin thawh a sawt lo hle.

Ruahman dan chuan pipe lian mm 900-a lian rawlh luh theihna tur verha chumi hmanga tangte vahchhuahtir tum a ni.

Thawhtanni atang khan thuneitute chuan leiverh pang atangin hmuh hnihah, an chhuahna tur verh leh an tum bawk.

Leiverh hnawhtu kaltlang hian mm 900-a lian pipe pathum, metre 60 vela sei rawlh luh tawh a ni.

Thawhlehni khan pipe pangana welding hna tan leh tawh a ni bawk tih thuneituten an sawi.

Pathianni khan Union Highways & Roads Minister Nitin Gadkari chuan a hmun hi a tlawh a, chhanchhuah hna hi ‘ni hnih thum vel’ thawh a la ngai dawn tih a sawi.