India hmar lam, Uttarakhand-a thuneitute chuan leiverh chima thawktu tang mi 40 velte chhanchhuah tumin ngawrh takin an bei mek.

Pathianni tukah khan leiverh siam hna an thawh mek lai hian hmun thenkhat chimin an tan phah mek a ni.

Thuneitu sang pakhat chuan an bepawp thei a, oxygen leh ei tur an pe bawk niin a sawi.

Hetih mek lai hian anmahni la chhuak tur chuan thui tak an hai a la ngai tho.

Police hotu, Arpan Yaduvanshi chuan thawktute an awm laiin Pathianni zing dar 5:00 vela Silkyara tunnel-a he thil hi a thleng niin a sawi a, a luhka atanga metre 200 vela thukah a nih thu BBC Hindi hnenah a sawi.

Silkyara tunnel hi Uttarkashi district-a awm niin sorkar laipuiin Uttrakhand-a sakhaw hmun pawimawh tlawha zin thinten kawng tha leh awlsam zawk an neih theihna tura kawng a sial zinga mi a ni a. Tlangram state-ah hian Himalayan tlang chhip leh vur hmunah Hindu sakhaw hmun thianghlim eng emaw zat a awm a ni.

Leiverh bul lawkah hian lei a min a, a lei tla hian leiverh pawh hi a tichim a. A hnawh avangin oxygen pawh a lut thei lo a ni.

Pathianni zanah khan tang mekte nen hian an walkie-talkie hmangin an inbe thei tawh niin thuneitute chuan an sawi.

Hna thawk mekten tui lak luh nana an hman pipeline chu oxygen, ei tur leh tui pek luh nan an hmang zui mek.

Chhanchhuah hna thawktute chuan excavator leh khawl lian dang hmangin lei tlate then tumin an bei mek a. Video thehdarhah chuan JCB-ten chhanchhuaktute kawhhmuh angin chirh leh lung tla an thian mek tih a lang.

“Leiverh chhung metre 15 vel kan lut tawh a. Kawng kan sial theih zel kan tum,” tiin Uttarkashi-a police hotu, Prashant Kumar chuan Thawhtanni khan ANI news agency hnenah a sawi.

Thuneitute hian lei tlate then chhung hi a rei dawn tih an sawi a, a hma berah pawh Thawhtanni zanah mi tangte hi an pawh thei hram mai thei chauh tih an sawi.

National leh state disaster relief team ten chhanchhuah hna hi an thawk mek a, Chief Minister Pushkar Singh Dhami-a’n a vil bawk.

Dhami-a hian Prime Minister Narendra Modi pawh a be tawh a, puihna awm thei ang ang pek a tum tih a sawi.

Uttar Pradesh atanga hna thawk ve, Ram Sundar Singh chuan zan lama an thawh hun a ni a, zing hma takah a thawhpui mi tlem tê nen inthiar tura lal\in nen an chhuak an let leh chuan leiverh chim chu an hmu ta tih BBC Hindi a hrilh.

Leiverh chhunga tang tam tak hi Uttar Pradesh, Bihar leh West Bengal atanga thawkte an ni hlawm a. An thawhpui pawn lama mite chuan hlauthawng takin an chanchin an ngaihven a, Pathianni zana Diwali lawm tuma an inbuatsaih mek laiin zingah vanduaina an tawk ta a ni.