ZALEN February 2, 2025 : Lengpui Joint Committee chuan enkawltu dang hnena Lengpui Airport hlan a that lohna an hriat loh rualin, India Air Force kut khera hlan an tha an ti lo a, he an duh lohna hi sawrkar aiawhte hnenah pawh an thlen tawh.

ZALEN thudawn danin kumin kum bul lama thukhawm, Lengpui khuaa NGO hrang hrang leh VC-te chuan IAF kuta Lengpui Airport hlan an duh lo tih thutlukna an siam a, he an thutlukna hi enkawltu dang hnena airport hlan zirchiangtu, Working Committee hnenah pawh an hriattir tawh.

Lengpui khawtlang hruaitute chuan enkawltu dang hnena airport hlan hrim hrim an dodal lo tih ZALEN an hrilh a, hetihlai hian IAF kut khera hlan erawh an duh lo tih an sawi.

Mizoram sawrkarin IAF kuta hlan tura hmalakna a kalpui zel a nih chuan a tawp thlenga dodal an tum thu an sawi bawk.

Tar lan tawh angin Mizoram sawrkar chuan IAF kuta Lengpui Airport hlan turin hmalakna a kalpui mek zel a, tun dinhmunah draft memorumdum of agreement (MoA) pawh duan fel thaw khat a ni tawh.

Hetihlai hian Lengpui khawtlang bakah Central YMA leh ZPM ni lo Mizorama political party hrang hrangte chuan IAF kuta airport hlan an duh loh thu leh a tawp thlenga dodal an tum thu thuchhuah siam an tar lang tawh bawk.