Aizawl January 5, 2024: Vawiin khan Minister of State Lalnghinglova Hmar, chuan a department chan LESDE, Sports & Youth Services leh Excise & Narcotics Department te kumthar inhlantharna hun a hmanpui a, posting chungchang leh hun vawn dik a ngaihpawimawh thu a sawi.

Excise & Narcotics hun a hmanpui naah Lalnghinglova Hmar, Minister of State chuan zu leh ruihhlo tihrêm leh khuahkhirh kawngah Excise & Narcotics Department chungah Mizoram mipuiin rinna an nghat a ni a ti. Resource neih sa hmanga tha taka thawk thei tura inringtawk turin thawktute chu a chah. Inkaihhruaina (manual) awmsa angin, post ngaia mi pakhat awm rei lutuk awm lo tura kalphung siamthat a nih tur thu a sawi bawk.

LESDE Directorate inhlantharna programme chu Minister Lalnghinglova Hmar chuan Thawktute chu hun vawng dika hmang tha tur leh, hnathawh hun chhunga theihtawp chhuah thin turin a chah a. Sawrkar leh mipui tan tangkai zawk leh zau zawka hma lak theih dan ngaihtuah thin tur leh, midang tihdan tha zawk a awm chuan entawn hreh lo turin a chah a ni.

Sports & Youth Directorate Conference Hall-a kumthar inhlantharna programme a hmanpui naah Sports-ah result tha neih a, medal lak tam chu Sawrkar-in a ngaihpawimawh ber a ni dawn tih a sawi. Sports kaihhnawih scheme te chu mimal hlawk nana hman tum lo turin thawktute a chah bawk. Sawrkar hnathawk chu hun vawng dik leh hmang tha turin a beisei tih sawiin, chhiatni thatni, kohhran leh khawtlanga inhman dan thlengin chin tawk neih a pawimawh thu a sawi bawk.