Nepal khawthlang lam hmun kilkhawr lai chu Zirtawpni zanlai khan lirnghingin sawiin mi 150 chuang an thi.

Kathmandu atanga khawthlang lam km 500 vela hla, Jajarkot leh West Rukum district-ah te hian chhanchhuah hna thawk turin venhim hna thawktute pawh tirh an ni.

Lirnghing na tak hi Nepalese khawpui bakah an thenawm, India-ah pawh hriat niin Delhi pawh a sawi.

Sipai thupuangtu chuan mi 100 chuang inhliam an awm thu a sawi a, Jajarkot-a damdawi in chu hliamin an khat niin a sawi.

Aathbiskot Mayor Rabi KC chuan, “Mi an chiai a, an hlau va, pawnah an awm vek,” tiin BBC hnenah a sawi.

Zan lamah na takin a sawi a, pawnah an tlan chhuak hlawm a. “Hluma sak in za tel a chhia a, chhanchhuah leh chhawmdawl hna kan thawk mek zel a ni,” tiin Inrinni chhunah a sawi.

A nghin hmasak ber atanga darkar khat chhungin vawi thum a sawi nawn leh a, mi tam tak chu an inin a chim hnan mai an hlauh avangin zanah pawnah an riak hlawm a ni.

Tual chhung chanchinbuten video an thehdarhah chuanin chhawng sang tak tak, leirawhchana sakte chu a tlusawp hlawm a. A chim karah hian daman awm em tih haiin zan thim hnuaiah mi eng emaw zat an che chhuak bawk tih social media-ah tar lan a ni.

Unicef Nepal chuan thil chhia leh thi leh hliam zat an ngaihven mek tih sawiin naupang pawh an tel nual an ring.

Nepal Prime Minister Pushpa Kamal Dahal chuan Inrinni khan lir nghinnahmun hi a tlawh nghal a, nunna tam tak chân a ni leh thil tam tak a chhia chu ‘pawi a ti tak zet’ tih X-ah a tar lang a. Venhim hna thawktute chu rang taka chhanchhuah hna leh chhawmdawl hna thawk turin a ti nghal.

Hetih lai hian lirnghingin lei a tihminten kawng a hnawh nasat avangin chhawnchhuah leh mi zawn hna a khaihlak tho.

Jajarkot district police chief Suresh Sunar chuan an dinhmun dik tak hriat hleihtheih a la ni lo tih Reuters news agency hnenah a sawi.

“Kei ngei pawh pawnah ka awm a, zan thim leh vawt hnuaiah report kan la khawm mek a; mahse, hmun kilkhawr atanga dawn vek chu a harsa hle,” a ti.

Nepal-a Monitoring & Research Centre chuan lirnghin hun hi Zirtawpni zan dar 11:47 (India-a zan dar 11:32) niin an chhinchhiah.

US Geological Survey chuan magnitude 5.6-a na a nih thu leh shallow earthquake a nih thu an sawi a, hei hi lawn pawnlang tak atanga nghing tan tihna a ni.

Nepal hi Himalaya tlangdung, lir a nghin duhna hmuna awm a ni a. Thla hmasa maiah pawh khan magnitude 6.3-a nain khawthlang lama Bajhang district a sawi a, hliam eng emaw zat an awm.

Kum 2015 khan lirnghing na tak pahnihin a sawi a, mi 9,000 chuang thiin mi 22,309-in hliam an tuar.

A hmasa zawk hi April 25, 2015-a thleng niin magnitude 7.8-a na a ni a, thil tam tak tichhiain thi an tam hle bawk a. A nghing nawn vawi tam a thlang a, a na ber chu May thlaa magnitude 7.3-a naa nghing a ni.

Khawthlang lam leh an ram lailia chenna in 8,00,000 chuang a chhia niin International Federation of Red Cross & Red Crescent Societies (IFRC) chuan a sawi.

Sorkar in, kawngpui leh Kathmandu Valley-a hmun pawimawh, Unesco world heritage site tam tak pawh tihchhia a nei a, Kathmandu hmar lam khuate phei chu in zawng zawng a chhia.