ZALEN April 8, 2025 : Mizote kan changkang ve zel a, mi tam takin kan neih phak loh tura kan ngaih lirthei chi hrang hrang kan kawl ta fur mai. Aizawl mai ni lo, thingtlang khaw kil ber thlengin car nalh tak tak a awm ther fur ta mai a, two wheeler phei chu a man a tlawm avang leh loan hmanga lei a awlsam tak zel avangin nei an tam ta a.

Mizoram-ah chuan two wheeler hi hralh tam ber ni thinin Aizawl khawpuia mi tam ber chuan traffic jam pumpelhna atan leh chetvel a awlsam avangin two wheeler chu chhungkaw tin deuh thaw in an nei ta hial mai a. Thingtlang lamah pawh fehna atan leh thil phurhnan an hmang tangkai hle.

Nikum April atanga kumin March chhunga Mizoram lirthei hralh zingah pawh two wheeler hi tam berin lirthei hralh zawng zawng atanga chhutin 76% lai chu two wheeler an ni.

April 1, 2024 atanga March 31, 2025 tlai thleng khan Mizorama transport office hrang hrangte chuan lirthei chi hrang hrang 28,811 an ziak lut a, heng zingah hian two wheeler a tam ber a, 21,926 zet ziah luh a awm a. LMV chuan a dawt a, 4,061 ziah luh a ni.

Ministry of Road Transports & Highway-in an website-a an tar lan danin April 1, 2023 atanga March 31, 2025 tlai thleng khan DTO hrang hrangtena revenue an hmuh chu Rs 40,31,57,615 a tling a. Tangka faia hmuh Rs. 19,47,89,307 bakah online atanga hmuh Rs 20,83,61,558/- a ni bawk a, thil dang atanga hmuh Rs 6,750 a awm bawk a. Tax defaulter 75,962 zet an awm niin tar lan a ni.

Aizawl DTO chu lirthei ziak lut tam ber a ni a, 21,154 an ziak lut a, revenue collection pawh a hmu tam ber niin Rs 27,19,34,312 an hmu chhuak a, pawisa faia hmuh Rs 12,64,62,068 leh online-a hmuh Rs 14,54,67,244 awmin thil dang atanga hmuh Rs 5,000 a awm bawk a ni.

Kolasib DTO chuan hemi hun chhung hian lirthei 1,318 an ziak lut a, two wheeler a tam lawr lak a, an ziah luh hi 1,046 niin LMV 172 a awm bawk a, revenue collection hi Rs 2,26,39,000 awmin pawisa faia hmuh Rs 1,01,38,251 leh online atanga hmuh 1,25,00,749 a ni.

Champhai DTO chuan lirthei 1,256 ziak lutin revenue-ah Rs 2,82,93,796 an hmuchhuak a, Lawngtlai DTO chuan lirthei 1,054 ziak lutin Rs 1,44,85,068 chu sawrkar sum bawmah an chhung lut bawk a. Lunglei DTO chuan lirthei 2,067 ziak lutin Rs 3,03,38,637 an thawk chhuak bawk a ni.

Mamit DTO chuan lirthei 434 ziak lutin Rs. 83,78,871 an thawk chhuak a, Siaha DTO chuan lirthei 830 ziak lutin Rs. 1,24,95,119 an thawk chhuak bawk a. Serchhip DTO chuan lirthei 698 ziak lutin Rs. 1,45,91,062 an thawk chhuak bawk a ni.