Samyukt Kisan Morcha chuan November 29-a lo neihna lam kaihhnawih dan thar duh lohna lantira parliament thleng kawng zawh an tum chu an thulh ta a; mahse, dan anga taka dan thar hlih leh tum hi hlih a nih hma chu duh lohna leh thil dang phutna an lantir zel dawn.

Farm law tia an sawi pathumte hi sorkarin hlih leh a tum thu a puang tawh a; mahse, lo neitute chuan sorkarin an thar chhuahte mi dangin an lei theihna man hniam ber (minimum support price) siamsak tur te, duh lohna an lantir chhunga lo neitu thi leh Lakhimpur-a minister lirthei ni ngeia an sawiin lo neitu a chil hlumte zangnadawmna pek an phut.

Parliament hi Thawhtanni hian thlasik thutkhawm an tan dawn a. Tan niah hian Delhi daia dan thar duh loh lantira awm mek lo neitute hian parliament thleng kawng zawh an tum.

Prime Minister Narendra Modi-a chuan  November 19 khan dan thar pathumte hi hnuh kir a nih tur thu a lo puang tawh.

Inrinni khan lo neitu pawl, Samyukt Kisan Morcha hruitute hi Agriculture Minister Narendra Sing Tomar nen inbiain an thil phut tihfelsak an nih tawh avangin an inah hawa lungawi lohna lantir titawp turin a ngen. 

Lo neitute thil phut belh chungchangah pawh Tomar chuan dan duh lohna an lantir laia lo neitute laka thubuai siamsak leh thite zangnadawmna pek tura an ngiat pawh heng thil thlenna state sorkarin a chin fel tura tih a nih thu a sawi.

“Duh lohna lantir laia thubuai ziah luhte pawh a ziak luttu state sorkar zelin thutlukna a siam dawn a. State sorkar bawkin anmahni state-a an kalpui angin zangnadawmna an phut pawh a tihsak dawn a ni,” tiin Tomar hian news agency ANI a hrilh.

Samyukt Kisan Morcha hruaitute erawh chuan Prime Minister Modi-a’n hemi chungchangah hian state sorkar leh railways hotute chu an laka thubuai ziah luh hnuk kir turin hrilh se an ti.

Agriculture minister chuan sorkar laipui chuan lo hal khu avanga thubuai siamsak lo neitute thubuai chu a hnuk kir tih a sawi bawk.