DOWNLOAD OUR APP

Read latest news on your phone
app-store

Lu tuam buaina: Court-in Muslim-ten an lu an tuam kher a ngai lo ti

Mar 15, 2022

India rama Muslim tam takin an ngaihchan, zirna in chhunga lu tuam leh tuam loh chungchangah Karnataka High Court chuan Islam hmeichhiaten an lu an tuam, hijab chu an sakhuanaa tul ber (essensial) a ni kher lo tiin thutlukna a siam. Court hian state sorkarin zirna in chhunga lu an tuam a khap pawh kenkawh tlang turin a ti a. Court-a thu thehluttute hian Supreme Court-ah thlen that leh an tum nghal.

Karnataka High Court chuan Islam hmeichhiaten an lu an tuam, hijab chu an sakhuanaa tul ber (essensial) a ni kher lo tiin thutlukna a siam.

Court hian state sorkarin zirna in chhunga lu an tuam a khap pawh kenkawh tlang turin a ti.

Thawhlehnia thutlukna puan tak hi thla chuang fe zir ina lu tuam leh tuam loh chungchanga inhnialna nasa tak a awm hnua a siam a ni.

Karnataka-a college pakhat chuan January thla khan Muslim hmeichhiate chu zirna in chhunga an lu an tuam a phalsak lo va, hemi duh lohna leh thlawpna chu nasa taka lantir zui a ni.

Thlawptu leh duh lotute inkara boruak tha lo tak a awm zui avangin state sorkar hian sikul leh college chu ni eng emaw chhung a khar phah.

Muslim hmeichhe thenkhat chuan high court-ah petition thehlutin lu an tuam chu India ram danpuiin a phalsak niin an sawi.

Judge pathum awmna bench chuan ngaihtuahin Muslim hmeichhiaten zirna in chhunga lu an tuam chuan an zalenna a tibahlah zawk a, danpui hnuaia sakhaw tin zalenna chu a dodal zawk niin a sawi.

Phek 129-a chhah thutlukna a tar lannaah chuan Quran leh Islam sakhaw lehkhabu hrang hrangah hijab chu sakhuana thila tih ngei tur a nih loh thu leh rawtna a nih mai thu an tar lang.

February thla khan petition thehluttute chuan sorkarin zirna ina uniform tur a duan chuan danpui hnuaia dikna chanvo an neih a palzutsak niin an lo sawi tawh.

Court erawh chuan sorkar thupek chu a dik a, zirlaite inthuamna tur duan chu a tih tur zinga mi a nih thu a sawi.

Thawhlehnia high court thutlukna hi Supreme Court-ah ngaihtuah tha leh tura thlen ngei a nih a rinawm.

“Hetiang thubuai hi chu Supreme Court thlenpui ngei tur chi a ni,” tiin petition thehluttute aiawha ding pakhat, Prof Ravi Varma Kumar chuan BBC Hindi hnenah a sawi.

Karnataka sorkar chuan thutlukna chu lawmawm an tih thu leh tha an tih thu an sawi ve thung.

Hijab thubuai hi India rama sakhaw zuitu tlem zawk, Muslim sang tam takin an ngaichang thup a ni.

Share now