Karnataka-a Muslim hmeichhe zirlaiten zirna ina lu an tuam an phalsak loh leh dodalna thawm a rin mek laiin zirlaiten an college uniform ha chungin nghawngawrh (scarf) serthlum rawng an awrh leh.

Kundapur, Udupi district-a thil thleng video darhah hian hmeichhia leh mipa zirlaite chuan scarf an hren bakah ‘Jai Shri Ram (praise Lord Ram)’ tiin an college kalkawngah an au rual.

Muslim zirlai hmeichhiaten an sakhaw dana lu tuam chunga zirna in kai phal loh hian ram pum luah mekin Congress leh the BJP inbeihna pawh a nasat phah hle.

Video clip-ah chuan Muslim zirlaite chu an lu tuamin an awm a. Police motor pawh college bulah a inchhawp bawk.

Police-te hian serthlum rawng scarf nena inthuam, bazar bula inhawr khawmte chu an hnawt darh tih video-ah hian a lang. 

Video hmasa lamah tuipui kam khua, Kundapur-a Government Junior College-a Muslim zirlaite hi an lu tuam chunga class an kai khapsak an nih avanga Principal Ramakrishna GJ nena an intawng lai a lo darh tawh. 

College danah hian heng hmeichhiate hian campus-a an lu an tuam a phalsak a, class room-a an tuam erawh phal a ni lo tih thuneitute chuan an sawi.

Karnataka Home Minister Araga Jnanendra chuan zirlaite hian zirna inah lu tuam emaw, scarf hren awm an ti tur a ni lo tih a sawi.

“Sikul hi eng sakhaw mi naupang pawh a inzirna tur niin tumah danglam bik an awm lo va, an vaiin India fate vek an ni,” tiin danglam bika awm a rem lo niin thuthar lakhawmtute a hrilh.

“Sakhaw pawl thenkhat, ngaihdan dang nei an awm a, police-te chu vil tur leh inpumkhatna a awm theihna tura ti turin ka ti,” a ti.

POLITICS-A INBEIH NAN HMANG NASA

BJP rorelna, Karnataka-ah hian tun tum thil thleng ang hi a lo thleng tawh a. Thla khat vel liam khan PU Girls College, Udupi-ah a lo thleng tawh a. Zirlaite hian lu tuam chunga zirna an dawn theih nan an la bei chhunzawm zel.

Zirlai hmeichhiaten lu tuam chunga zirna an dawng thei lo hian sawisel a hlawhin political party-te pawhin inbeih nan an hmang nasa hle.

Congress hruaitu, Rahul Gandhi chuan college thuneituten classroom-a lu tuam an khap chu sawiselin, “India fanute hma lam hun kan rawk a ni,” a ti.

“Zirlaite an zirnaa an lu tuam kan khapsak hian India fanute hma lam hun kan rawk a. Ma Saraswati hian engkim a hria a, tumah a en hrang ngai lo,” a ti.

Karnataka BJP chuan Gandhi hi chhangin Congress hruaitu chu ‘zirnaa chi inthliarna vawrhah’ an puh a. “Congress hruaitu Rahul Gandhi hian India hma lam hun tan a hlauhawm a ni tih a inlantir nawn leh ta a ni,” an ti.