July 19, 2023; Social Activist Ruatfela Nu chuan, kan lui tui te  mihring tih bawlhhlawh ngei a nih avangin a ti bawlhhlawhtute chhui chhuah an nih a, dan anga an chunga action lak a nih theih nan, Chief Judicial Magistrate (CJM) hnenah chhui phalna a dil dawn.

Thuchhuah a siamah Ruatfela Nu chuan, Mizorama lui hrang hrang, mihring leh thlai, ran leh ramsa, lui nungchate tana ei tlak lo khawpa a nut chhan chu-National Highway & Infrastructure Development Corporation Limited (NHIDCL) kawng laiin dan loa an kawng laihna vung kawng thlanga an nawr liam vang a ni tih a tarlang.

Aizawl khawpui chawmtu Tlawng lui nut chhan pawh state sawrkar hmalakna link road laihna leivung dan loa paih vang te, hmasawnna hna hrang hrang thawhna leivung leh bawlhhlawh paih vang te, insakna hnawmhnawk bakah mimal leh dawrkai bawlhhlawh a ruka lui kawr leh Tlawng lui fintu luitea paih
vang te a ni tih tarlang bawkin, chutianga dan loa leivung leh bawlhhlawh paih chu ruah a surin Tlawng luiah a lut khawm vek niin a tarlang.

Aizawl khawpui chawmtu, Tlawng lui nut vanga tui a pump theih loh vangin furpuia kan lui tui a tam em em laiin tui tamin kan tam mek tih tarlang bawkin, Mizoram luite hi fur ruah sur vangin in tlak loh khawpin a nu ngai lo a, a finfiahna video clip, pawh a nei tih a tarlang.