Brazil chu 44.8°C zet niin an ram chanchina a lum ber tum an tawng a, khaw lum uchuak takin an ram a tuam mek.

Brazil chhimchhak lama Minas Gerais state-a Araçuaí khuaah Pathianni khan record thar hi a thleng a ni.

Beisei lawk loh khaw awm dan uchuak tak hi El Niño phenomenon leh sik leh sa inthlak nasa vanga thleng a ni pakhat.

Khawchin zirtute chuan tun karah hian lum lutuk hi a ziaawm deuh tan dawn niin an sawi.

National Institute of Meteorology (Inmet) chuan state khawpui pathumah chuan 40°C chung a ni tawh dawn niin an sawi tih CNN Brasil chuan a tar lang.

Sorkar chuan Araçuaí-a 44.8°C hian a hmaa an ram lum ber chhinchhiah, kum 2005-a 44.7°C chu a khum tih an sawi.

Khaw lum avanga inralrinna hi ram pumah tihchhuah a ni a, hei hi khawvel chhim lama nipui a in\an hma thla khatah a ni a. Miin intihdaihna hmanrua an hman nasat avangin an energy hman ral pawh a san ber hun lai a thleng bawk.

Zirtawpni khan khaw lum lutuk avanga mi pakhat damlova a thih zui avangin Taylor Swift-i chuan Rio de Janeiro-a a concert tur pakhat chu a lo \hulh tawh.

A huaihawttute chuan kum 23 mi, Ana Clara Benevides Machado-i hi concert-na tur khelmuala a awm laiin a nuam lo tih a insawi a, puih niin damdawi in panpui nghal ni mah se a hnu darkar khat velah a thi tih an sawi.

Thuneituten chawlhkar hnih liam ta chhung an zirchiannaah an rama khaw lum lam chawhrual chu July leh October inkarah chuan a san ber lai a nih thu an lo sawi tawh.

Khaw awm dan uchuak tak tak hi khawvel hmun hrang hrangah a tam tawh hle a, hengte hi a na tual tual a, a hun chhung pawh a rei sawt sawt a, sik leh sa inthlak nasa vang niin mi thiamte chuan an sawi.

Scientist-te chuan khaw lum uchuak pawh hi hmun thenkhatah a hun chhung a reiin a na tawlh tawlh niin an sawi a, hetih lai hian khawvel tilum zual thei greenhouse gas tihchhuah a tlem chuang lo.

Hetih lai hian tunah hian khawvel hi El Niño weather phase-ah a awm mek a, hetih lai hian khawvel a lum zual thin.