ZALEN April 15, 2025; All Mizoram CSS Employees Coordination Committee (AMCECC) ten vawiin atanga ni thum chhung sawrkar lakah lungawilohna Pen/Tool Down Strike neih an tum chu an kaltlangpui dawn.

AMCECC in April 15, 16 leh 17, 2025 chhunga nawrhna huaihawt an tum chungchangah hian nimin chawhma dar 11 khan Mizoram sawrkar aiawh Chief Secretary Charge la tu H. Lalengmawia hovin Chief Secretary Conference Hall-ah thutkhawm a ni a, he thutkhawmah hian AMCECC in Pen/Tool Down Strike neih an tum thulh turin sawrkar chuan a ngen a, All Mizoram CSS Employees Coordination Committee (AMCECC) emergency meeting koh nghal niin, sawrkar lak atangin an thil phut tihhlawhtlinna tur engmah lungawipui tur thu an hmuhloh avangin Pen/Tool Down Strike April ni 15,16, 17 a 2025 neih an tum chu kaltlangpui an tum a ni.

Hetianga Mizoram sawrkar aiawh Chief Secretary Charge la tu H. Lalengmawia hova inbiakna an neih mek laia Mizoram sawrkar in “Enforcement of CSS (Conduct) Rules, 1964 and No Work No Pay, chungchang Office Memorandum a chhuah hnan leh nghal chu, CSS hnuaia hnathawkte hnuaichhiahna leh vauna lian tak niah an ngai tih an tarlang bawk.

All Mizoram CSS Employees Coordination Committee ten Pen/Tool Down Strike neih an tum hi an tarlan tawh thin angin, Mizoram sawrkar an karna leh lungawiloh tum ngawr ngawr an ni lo tih an sawi a. Mizoram sawrkar hnuaia CSS te an ngheh ve theihna tur dan : Govt. Of Mizoram Regularization of CSS Employees scheme, 2024 Ni 18th June, 2024 siam tawh chu a taka a hlawhtling mai tura an beisei laia, DP&AR(ARW) atanga Office Memorandum Ni 21.10.2024) chhuaka checklist in a dal leh tak tlat avanga loh theih lova sawrkar an nawr a ngai tih sawiin hrehawm an tiin, an nawrhna avanga tuartu mipuite hriatthiamna leh ngaihdamna an ngen tih an tarlang a ni.