Aizawl: Lunglei DC Office staff te hnathawh, chak zawk leh langtlang taka kalpui anih theihnan leh District mipuite nena thawhhona tha tak a awm chhunzawm zel theihnan Zirtawpni atang khan Lunglei DC Office thawk te tan Corruption Risk Assessment (CRA) bul tan a ni a. CRA kengkawh tur hian Lunglei DC Office ah staff member 15 awmna Working Group din a ni. 

CRA bul tanna puala meeting neihah Lunglei DC Kulothungan A chuan, "DC Office chu District mipuite nena in ngheng hnai tak leh District-a sawrkar department hrang hrang hnathawh khaikhawmtu an nih avangin an hnathawh a pawimawh tak zet a ni," a ti a. DC Office staff-te chu an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel tura chahin office thlen hma kawnga tan la tur leh tul hle lovah chuan chawlh (leave) la lo turin a chah a. An hnathawhna kawnga harsatna an tawh te inthlahrung lova hotute hnena thlen vat thin turin a sawm bawk.