August 12, 2022; August ni 2, 2022, Thawhlehzan dar 6:30 bawr vel a Sihhmui kai, Tlawnglui a chesual Mafaktea leh a fapa kum 10 mi Sawmsawma te chu Mizo dan anga ni 7 chhung zawn an nih hnuah, chhungkhat laina hnai leh thenrual tha ten an la zawn chhuzawm zel a, thuthar erawh a la awm thei lo.
 
C. Lalfakzuala @ Mafaktea nupui Rebecca Lallawmzuali unaupa John Lallianzuala hnen atanga ZALEN thudawn danin, a nawlpui a zawn kharna neih a nih hnuah, chhungkhat laina leh an thenrual tha te chu, Sihhmui leh Sairang lamah an thawkchhuak chhunzawm thin a, an chetsualna Sihhmui kai Leidawn thlang deuh luikam ah leh Sairang balu kaiah te bukte sain, chutah chuan chin chang ngaihvenin nitin (chhun lamah) an thawk chhuak thin.

"Tui a la tam a, tui chhungah te luh theih a la nih bawk si loh avangin tih theih chu a tlem khawp mai, mi kan buai tlang a, kan tibuai rei tawh bawk a, Sihhmui lam mi tui thiam Muana tlawmngai turin kan ngen a, Lawngin a vei kual reng a, keini lam tan chuan tihtheih a la tlem khawp mai," John Lallianzuala chuan a ti.

Chhungkhat laina hnai leh thenrual tha ten Mafaktea te pafa an zawn chhunzawm chungchangah hian YMA lam pawhin an chanchin an ngaihven reng tih John Lallianzuala chuan a sawi.,

Tarlan tawh thin angin, Mafaktea te pafa hi ni 7 zawn an nih hnuah August 9, 2022 khan Central YMA chuan 'a nawlpui a zawn hna kharna' Sihhmui lei ah a lo buatsaih tawh a ni.